Саха Республикатын народнай поэта. Ермолаев Рафаэль Дмитриевич – Баҕатаайыскай 1931 с. ыам ыйын 1 күнүгэр Мэҥэ-Хаҥалас улууһугар төрөөбүтэ. Дьокуускайдааҕы тыа хаһаайыстыбатын техникумун, СГУ-тын, Москватааҕы үрдүкү партийнай оскуоланы бүтэрбитэ.

Саха сиринээҕи кинигэ издательствотыгар редакторынан, «Чуораанчык» сурунаал кылаабынай редакторынан үлэлээбитэ.

1951 с. бэчээттэнэр. «Кытыан кымньыы» диэн үгэлэрин, хоһооннорун бастакы кинигэтэ 1957 с. бэчээттэммитэ. Сатирик-поэт быһыытынан киэҥник биллибитэ. «Уолаттар уонна кийииттэр» хоһоонунан романа туспа кинигэнэн тахсыбыта. «Бэйэҥ сулускун булуоҥ» роман, «Мөһүүрэлээх бөтүүктэр» сэһэн кинигэлэрин ааптара. Ол эрээри норуот таптаан ыллыыр ырыаларын тылын  суруйбут лирическэй, гражданскай поэт быһыытынан эмиэ биллэр. Кэлин сылларга саха чулуу дьонноругар анаабыт поэмаларын бэчээттэттэ. Ахтыылары суруйда.

П.А. Ойуунускай аатынан Государственнай бириэмийэ лауреата. «В.И. Ленин төрөөбүтэ 100 сылын туолуутун бэлиэтээн. Килбиэннээх үлэтин иһин» мэтээлинэн наҕараадаламмыта. 1962 с. ССРС, 1991 с. СР Суруйааччыларын союһун чилиэнэ.