Борисова-Слепцова Альбина Андриановна – от ыйын 12 күнүгэр 1952 с. Дьокуускай куоракка төрөөбүтэ.

Дьокуускай куорат 26 №-дээх орто оскуолатын бүтэрбитэ. Дьокуускайдааҕы П.А. Ойуунускай аатынан судаарыстыбаннай музыкальнай-драматическай театрга тылбаасчыт-дикторынан үлэлээбитэ. Ити сыллара кини айар үлэтигэр олук уурбуттара. 1974 сыллаахха Саха сирин суруйааччыларын Союһун правлениятын, народнай поэт Семен Данилов тус көҕүлээһининэн, М.Горькай аатынан Литературнай институт уус уран тылбааһын кафедратыгар конкурс биллэриллибитэ. Литературнай институтка үөрэнэр кэмнэригэр пьесалары тылбаастааһынынан дьарыктаммыта.

1979 с. үөрэҕин түмүктээн САССР гостелерадиотын редакторынан уонна режиссер көмөлөһөөччүтүнэн, онтон Бүтүн союзтааҕы театральнай общества Саха сиринээҕи салаатын эппиэттиир секретарынан үлэлээбитэ. Синхроннай тылбаас дикторын быһыытынан Саха драмтеатрын труппатыгар киирэн Россиятааҕы уонна Бүтүн Союзтааҕы фестивалларга Москваҕа, Хабаравскайга, Бишкекка, Киевка, Ленинградка, Тиблисигэ кыттыбыта. 1985 с. Киин телевидения ыҥырыытынан С. Курилов “Ханидо уонна Халерха” испектээкилин синхроннай тылбааһын аахпыта.

1987-1993 сс. республикатааҕы “Чуораанчык” (“Колокольчик”) оҕо сурунаалыгар отдел редакторынан үлэлээбитэ.

1994 с. “Бичик” Национальнай кинигэ кыһатыгар оҕо литературатын редакциятын сэбиэдиссэйинэн киирбитэ. 1995 с. издательства сүрүн редакторынан анаммыта. 1998 с. саҥатыгар издательства атыыга-эргиэҥҥэ салаатыгар директоры солбуйааччынан анаммыта.

2001-2013 сс. Саха Республикатын Ил Түмэнин Пресс-сулууспатыгар үлэлээбитэ. “Избранные народом”, үс томнаах “Саха театрын Антологията” о. д. а. үгүс кинигэлэри таһаарсыбыта.

А.А. Борисова уус-уран литератураҕа аҕыйах ахсааннаах нууччалыы сахалыы суруйар, литература араас жанрдарыгар үлэлиир профессиональнай тылбаасчыттартан биирдэстэрэ. Тылбаастара “Чуораанчык”, “Колокольчик”, “Полярная звезда”, “Далбар хотун” сурунаалларга, “Саха сирэ”, “Якутия” хаһыаттарга, хомуурунньуктарга, туһунан кинигэнэн бэчээттэммиттэрэ.

1999 сылтан Россия Суруйааччыларын союһун, Россия суруналыыстарын союһун чилиэнэ.

Саха Республикатын культуратын үтүөлээх үлэһитэ. Саха Республикатын бэчээтин туйгуна. Саха Республикатын Ил Түмэнин Бочуотунай грамотатынан, Саха Республикатын Ил Түмэнин Председателин Махтал суругунан, “Саха сирэ уонна Россия 380 сыл” юбилейнай бэлиэнэн наҕараадаламмыта.