Байгожаева Яна Ербулатовна – муус устар 1 күнүгэр 1977 с. Казахскай АССР Алма – Атинскай уобалаһын Капчагай куоратыгар күн сирин көрбүтэ. Оҕо сааһа Саха сирин Уус Алдан улууһун Бэйдиҥэ нэһилиэгэр ааспыта.

Поэт, Сергей Васильев – Борогонскай аатынан Саха Республикатын правительствота уонна “Уус Алдан улууһа” муниципальнай тэриллии олохтообут Гранын итиэннэ Саха Республикатын ыччат политикатын министерствота Поэзияҕа Гранын хаһаайката. 2003 сылтан Россия суруналыыстарын союһун чилиэнэ, 2012 сылтан Россия суруйааччыларын союһун чилиэнэ.

М.К. Аммосов аатынан Саха государственнай университетын филологическай факультет суруналыыстыка салаатын бүтэрбитэ. ООО “Сахаинтернет” “Курсор.ру” интернет-хаһыатыгар суруналыыһынан, ГУ “ЯСИА” редактор-репортерунан,  “Сахамедстрах” ААУо ГСМК пресс-секретарынан үлэлээбитэ. Билигин “Аэропорт Якутск” АУо пресс-секретарынан уонна “Международный аэропорт Якутск” сурунаал сүрүн редакторынан үлэлиир. 2014 с. “Тэтим” айар студияны тэрийэн үлэлэтэр, студия бастакы улахан үлэтэ – «Муммуттар” уус –уран киинэ.

1990 с. бэчээттэнэр, маҥнайгы хоһооннорун хомуурунньуга “Эймэһийэр эдэр сүрэх” аатынан 1995 с. тахсыбыта. 2002 с. “Бичик” кинигэ кыһатыгар “Ааспыт олоҕум ой дуораана” иккис хоһооннорун хомуурунньуга бэчээттэммитэ. Эдэр суруйааччылар республикатааҕы XV cүбэ мунньахтарын мэктиэтинэн 2007 с. “Бичик” кинигэ кыһатыгар үһүс хоһооннорун хомуурунньуга “Сырыы аайы саҥаттан” аатынан күн сирин көрбүтэ. 2014 с. “Таптал арыыта” төрдүс хоһооннорун хомуурунньуга бэчээттэмитэ.

Айымньылара киин, республика сурунаалларыгар уонна хаһыаттарыгар, хомуурунньуктарга бэчээттэнэллэр.