Андросов Гаврил Гаврильевич – (06.05. 1985 с.) поэт, публицист, саха бастакы народнай поэта С.Р. Кулачиков-Эллэй аатынан стипендия стипендиата, Саха Республикатын ыччат политикатын министерствотын поэзияҕа Гранын хаһаайына, Саха Республикатын ыччат дьыалатыгар уонна дьиэ кэргэн политикатыгар министерствотын “Сыл бастын эдэр суруйааччыё номинациятын кыайыылааҕа. Россия суруйааччыларын союһун 2010 с. чилиэнэ, 2013 с. Саха сирин суруйааччыларын союһун правлениятын председателин солбуйааччы.

Саха Республикатын Таатта улууһун Баайаҕа нэһилиэгэр төрөөбүтэ. М.К. Аммосов аатынан СГУ саха тылын уонна литературатын факультетын литературнай редактирование уонна критика салаатын 2007 с. бүтэрбитэ. Студенныыр сылларыгар общественнай уонна айар үлэнэн утумнаахтык дьарыктаммыта. “Тобул”, “Түмэн” общественнай түмсүүлэр, “Байанай алгыһа” литературнай куруһуок көхтөөх кыттааччылара. “Тыл кыһата” литературнай түмсүү салайааччыта, үгүс эдэр ыччакка аналлаах литературнай күрэхтэһиилэри тэрийээччи.

Г.Г. Андросов студенныыр сылларыгар П.А. Ойуунускай аатынан литературнай музейга научнай сотруднигынан үлэлээбитэ. Суруналыыс быһыытынан “Эдэр саас” ыччат хаһыатыгар, “Көмүөл” общественнай-аналитическай хаһыакка үлэлээбитэ. “Уус саха” сурунаал редколлегиятын чилиэнэ. “Саха сирэ” хаһыат корреспонденынан, анаарааччытынан, ону тэҥэ “Саха” НКИК “Аал луук мас” студиятын редакторынан үлэлээбитэ. М.К. Аммосов аатынан Хотугулуу илиҥҥи федеральнай университет “Сэргэлээх уоттара” литературнай түмсүүтүн салайбыта. Билигин “Чолбон” сурунаал сүрүн редакторын солбуйааччынан үлэлии-хамсыы сылдьар.

Маҥнайгы хоһооннорун бөлөҕө Таатта улууһун “Таатта” хаһыатын “Дьүрүскэн” литературнай сыһыарыытыгар 2002 сыллаахха бэчээттэммиттэрэ, ол сыл айымньылара эдэр суруйааччылар “Болҕойуҥ, эдэр саас!” хомуурунньуктарыгар тахсыбыта. Эдэр суруйааччылар республикатааҕы XV cүбэ мунньахтарыгар хоһооннорун хомуурунньуктарын таһаарарга мэктиэлэммитэ. 2007 сыллаахха “Бичик” кинигэ кыһатыгар маҥнайгы хоһооннорун хомуурунньуга “Боотур холото” бэчээттэммитэ. Кини лиро-эпическай хоһоонноругар урукку интеллигенция дьылҕатын уонна билиҥҥи интеллигенция инникитин туһунан санаалара, иэйиилэрэ киирбиттэр. Бу кэмтэн история уонна духуобунас эдэр уол айар үлэтин сүрүн темата буолбута. Поэт үгүс айымньылара уус-уран хомуурунньуктарга киирбиттэрэ. Хоһооннорун А.А. Борисова, В.С. Андросов, Ю.Н. Щербаков уо. д. а. нууччалыы тылбаастаабыттара. Нууччалыы тылбаас көмөтүнэн хоһоонноро вьетнамныы, поляктыы уонна болгар тылыгар тылбаастаммыттара.

Г.Г. Андросов поэт быһыытынан Саха сирин тас өттүгэр биллэр – норуоттар икки ардыларынааҕы Намжил Нимбуев (Бурятия) аатынан поэтическай турнир призера, Кыргызтаҥҥа, Вьетнамҥа уонна Татарстаҥҥа ыытыллыбыт норуоттар икки ардыларынааҕы поэзия фестивалларын, Эдэр суруйааччылар I норуоттар икки ардыларынааҕы Переделкинотааҕы сүбэ мунньахтарын кыттыылааҕа (2010 сыл). Суотту (2009), Өктөм (2011) уонна Суотту (2015) Эдэр суруйааччылар семинардарын тэрийээччи.

2010 с. кыраайы үөрэтээччи С.Р. Попов-Сиэдэрэй Сэмэнниин “Былыргы сахалар суруктара-бичиктэрэ” научнай-популярнай кинигэни бэчээккэ бэлэмнээбиттэрэ. 2015 с. Саха сирин государственноһын историятын көрдөрөр “Туомтуу тардыы” диэн ыстатыйаларын хомуурунньуга тахсыбыта. Эдэр публицист ыстатыйалара үгүс анал таһаарыыларыгар, кинигэлэргэ бэчээттэммиттэрэ.

Г.Г. Андросов Ил Дархан Тыл политикатыгар сүбэтин, “Саха сирин суруйааччыта” ассоциация правлениетын, Россия суруналыыстарын союһун, Нуучча географическай обществотын, Бүтүн Россиятааҕы история уонна культура пааматынньыктарын харыстыыр общество чилиэннэрэ.