Иванов Алексей Андреевич-Күндэ (16.01.1898-30.10.1934) – поэт, прозаик, драматург, литературнай критик.

Сунтаар улууһугар Хаҥалас нэһилиэгэр орто бааһынай кэргэнигэр төрөөбүтэ. Иркутскайдааҕы учуутал семинариятыгар ситииһиилээхтик үөрэнэ сылдьан студеннар кистэлэҥ революционнай куруһуоктарыгар кыттан бүтэһик куурустан эмискэ уһуллубута. 1917-1923 сс. учууталынан, Саха сиригэр Сэбиэскэй былаас олохтонуутугар, күүһүрүүтүгэр актыыбынайдык кыттыбыта. Бүлүү куоратыгар кыраайы үөрэтэр музейы тэрийсибитэ. 1924 с. ССРС норуоттарын Киин издательствотыгар Саха секциятыгар эппиэттиир сэкэрэтээрэ. Москваҕа Д.Фурманов салайар литературнай куруһуогар сылдьан туһаммыта, айар үлэ кистэлэҥнэрин билсибитэ. А.Иванов тылы үөрэтиинэн дириҥник дьарыктаммыта. Ити сылларга улахан дьон үөрэнэр букубаардарын, ааҕар кинигэлэрин тэҥҥэ бэлэмнэһэр. 1926 с. икки чаастаах саха тылын грамматикатын таһаарбыта. 1927-29 сс. – «Кыым» хаһыат редактора, 1929-31 сс. – Саха сиринээҕи издательство редактора. 1931 с. – Саха АССР ЦИК Президиумун иһинэн тэриллибит саҥа алфавит Комитетын учуонай сэкэрэтээрэ.

Күндэ маҥнайгы хоһоонноро 1923 с. «Кыым» хаһыакка тахсыбыта. «Кыыһар туҥат» («Алое зарево») кинигэтигэр  Саха сирин кэрэ айылҕатын уратытын, норуотун олоҕун-дьаһаҕын дьиҥ баарынан ойуулаабыта.

Күндэ саҥа олоҕу, социализмы тутууну ис сүрэҕиттэн хоһоонноругар, кэпсээнинэн суруллубут айымньыларыгар, драмаларыгар уруйдаабыта, айхаллаабыта. Оттон баайдары, үрүннэри уонна да атын урукку олох бэрэстэбиитэллэрин наар куһаҕан өттүлэрин, адьырҕа майгыларын саралаан көрдөрөрө.

Суруйааччы үгүс хоһоонугар тыа сиригэр саҥа олох ситиһиилэрэ биллэр буолбуттарын кыраҕытык көрөн суруйара. Айылҕа, тулалыыр эйгэ быстах да көстүүлэрэ Күндэҕэ кэрэтийэн көстөллөр, дыргыл үчүгэй сыта-сымара муннугар саба биэрэргэ дылы гынар.

Оттон кэпсээннэригэр чахчы-бааччы олоххо баар дьону, кинилэр олохторугар хас күн аайы көрсөр ыарахаттарын уус-уран уобарастарга түмэн көрдөрөр. Кыһалҕалаах үлэҕэ Марба курдук мүкүллэ сылдьан баар-суох оҕолоруттан маппыттар аҕыйаҕа суохтара. («Марба»).