Алексеева Мария Егоровна (6.03. 1957 – 5. 12. 2015 гг.), тылбаасчыт-суруйааччы. 2000 с. Россия суруйааччыларын союһун чилиэнэ. СР (Я) культуратын үтүөлээх үлэһитэ. Россия улахан Литературнай бириэмийэтин иккис степеннээх лауреата.

Нам улууһун Модут нэһилиэгэр төрөөбүтэ. 1979 с. Москваҕа А.М. Горькой аатынан Литературнай институт уус-уран тылбааһын салаатын бүтэрбитэ.

Аллайыаха оройуонун “Сайдыы суола” хаһыатыгар литературнай сотруднигынан, эппиэттиир секретарынан, “Бэлэм буол” хаһыакка оҕону иитэр үлэҕэ отдел сэбиэдиссэйинэн, “Саха Сирэ” уонна “Советы Якутии” хаһыат социально-правовой отделын сэбиэдиссэйин солбуйааччытынан, Саха Республикатын Үрдүкү сэбиэтин секретариатын сүрүн специалиһынан, Саха Республикатын Ил Түмэн государственнай мунньаҕын документационнай управления начальнигын солбуйааччытынан үлэлиир. 2011 с. Саха Республикатын Ил Түмэн государственнай мунньаҕын документационнай управление начальнигынан үлэлээбитэ.

Суруйааччы-тылбаасчыт быһыытынан М.Е. Алексеева 1990-ус сыллартан биллибитэ. Сэбиэскэй союз тылбааһын оскуолатын ааһан, тылбаасчыт быһыытынан нууччалыыттан-сахалыы, сахалыыттан-нууччалыы тылбаастыыр улахан тылбаасчыкка үүнэн-сайдан тахсыбыта. 1991 сылтан саҕалаан Библияны саха тылыгар тылбаастыыр бөлөххө киирэн үлэлээбитэ. Бу үлэтэ 2004 сыллаахха түмүктэммитэ, туспа кинигэнэн “Саҥа Кэс тыл” аатынан бэчээттэнэн тахсыбыта. Бу үлэтин үрдүктүк сыаналаан 2007 сыллаахха Россия улахан Литературнай бириэмийэтин иккис степеннээх лауреатын аатын туттарбыттара.

Итини таһынан Петр Васильевич Оҕотоойоп “Элэс боотур” олонхотун нууччалыы тылбаастаабыта 2002 сыллаахха туспа кинигэнэн бэчээттэнэн тахсыбыта. Олус үчүгэйдик Василий Семенович Яковлев – Далан олоҕун туһунан “Дьылҕам миэнэ” (“Судьба моя”)        документальнай романын тылбаастаабыта 2003 сыллаахха “Бичик” кинигэ кыһатыгар бэчээттэммитэ.

Мария Егоровна Алексеева – улахан опыттаах редактор, нууччалыы-сахалыы олус үчүгэйдик билэр тылбаасчыт этэ. Үгүс Ил Түмэн сокуоннарын, уураахтарын хомуурунньуктарын 1994-2010 сс. кини салалтатынан, көрүүтүнэн бэчээккэ бэлэмнэммиттэрэ.