Аита Ефимовна Шапошникова (11.09.1957 с.) – тылбаасчыт, критик. 1995 сылтан РФ СС чилиэнэ.

Нам улууһугар худуоһунньук дьиэ кэргэнигэр төрөөбүтэ. А.М. Горькай аатынан Литературнай институту уус-уран тылбааска салаатын 1979 с. бүтэрбитэ. «Хотугу сулус», «Полярная звезда», «Чуораанчык» редакцияларыгар үлэлээбитэ. 1994 сылтан «Далбар Хотун» сурунаал эппиэттиир эрэдээктэрэ.

Кини сахалыыттан уус-уран тылбаастара аан бастаан «Полярная звезда» сурунаалга 1979 с. тахсыбыттара. Маҥнайгы тылбааһын кинигэтэ И. Егоров «Куба быыһаныыта» 1981 с. тахсыбыта.

Шапошникова тылбаастара республика хаһыаттарыгар, сурунаалларыгар, коллективнай хомуурунньуктарга, «Литературная Россия» нэдиэлэтээҕи таһаарыытыгар о.д.а. киин периодическай бэчээккэ бэчээттэммиттэрэ. Ону тэҥэ кини саха уус-уран литературатын ырытан проза, поэзия боппуруостарыгар ыстатыйалары суруйар республика суруйааччыларын литературнай мэтириэттэрин айбыта.

А. Шапошникова үрдүк таһымнаах уус-уран тылбаастара оригиналга харыстаахтык сыһыанынан, саха олоҕун дириҥник билиинэн уратылаахтар. Кини саха, нуучча тылын дэгиттэр билэринэн үрдүктүк сыаналанар.

Кэлин кэмҥэ А. Шапошникова нуучча литературатыттан сахалыы тылбааска ситиһиилээхтик үлэлэһэр.