Ыам ыйын 17 күнүгэр П.А. Ойуунускай аатынан литэрэтиирэ түмэлигэр «Санаанан санааны дабайан…» диэн Саха сиригэр Ньургуһун күнүн көрсө Василий Никитич Протодьяконов аатынан бастакы анал истипиэндьийэни туттарыы тэрээһинэ буолан ааста. Тэрээһини саха литэрэтиирэтин кафедратын магистраннара ыыттылар.

Бу күн үрдүк үөрэх кыһатыгар 55 сылтан тахса сыл айымньылаахтык үлэлээбит ытыктабыллаах учууталы Баһылай Никиитиһи истиҥ тылларынан ахтан аастылар.

Тэрээһини институт дириэктэрэ Г.Г. Торотоев арыйда, Баһылай Никиитис учуутал быһыытынан уратытын чорботон бэлиэтээтэ, оҕолоругар, аймахтарыгар истипиэндьийэни олохтообуттарыгар улахан махталын тириэртэ.

Университет бэрэпиэссэрдэрэ Г.Г. Филиппов, З.К. Башарина, суруйааччы Н.Е. Винокуров-Урсун, суруналыыс Иван Ущницкай, «Күрүлгэн» альманах эрэдээктэрэ А.А. Гуринов-Арчылан, кураатардаабыт устудьуоннарын аатыттан дассыан Л.Е. Манчурина, о.д.а. Баһылай Никиитиһи уһуйааччы, кураатар, мэтэдьиис, кириитик, чинчийээччи быһыытынан бэлиэтээтилэр. Бу тэрээһиҥҥэ Баһылай Никиитис бииргэ төрөөбүт эдьиийэ Татьяна Никитична Полятинская кытынна. Кини кыра Вася туһунан олус кэрэхсэбиллээхтик кэпсээтэ, быраата хоһоонноохтук ааҕарга үөрэппит П.А. Ойуунускай «Өрүөл кэриэһэ» айымньытын өйүттэн уус-ураннык ааҕан сөхтөрдө.

В.Н. Протодьяконов анал истипиэндьийэлэрин үөрүүлээх быһыыга-майгыга Баһылай Никиитис сиэн балта Наталья Михайловна Слепцова 3 куурус устудьуонугар Екатерина Гладкинаҕа туттарда, өссө үрдүк ситиһиилэри баҕарда. Екатерина Гладкина – нститут биир киэн туттар устудьуона, үөрэх туйгуна, билимҥэ үрдүк көрдөрүүлээх, суруйар дьоҕурдаах, култуура, уопсастыба тэрээһиннэригэр көхтөөх устудьуон.

Тэрийээччилэр В.Н. Протодьяконов олоҕор, чинчийэр үлэтигэр сыһыаннаах биктэриинэни ыыттылар. Оттон “Сэргэлээх уоттара” куруһуок устудьуоннара В.Н. Протодьяконов хоһооннорун аахтылар. А.С. Пушкин аатынан национальнай бибилэтиэкэ баай ис хоһоонноох быыстапканы туруоран кэлбит дьону кэрэхсэттэ. Бэлиэ түгэн Елена Старостина-Хотун Арылы толоруутугар «Ньургуһуннар» ырыанан уонна алаадьылаах үүттээх чэйи иһиинэн, истиҥ кэпсэтиинэн түмүктэннэ.

В.Н. Протодьяконов сырдык аатынан анал истипиэндьийэ кэнэҕэһин да үгүс устудьуону айар үлэҕэ, наука дьүккүөрдээх үлэтигэр кынаттыа, тирэх буолуо диэн эрэнэбит.