Хоһоонньут, кэпсээнньит суруйааччы, Аҕа дойду Улуу сэриитин кыттыылааҕа Тимофей Егорович Сметанин сэтинньи 25 күнүгэр төрөөбүтэ 100 сылын өрө көтөҕүллэн бэлиэтээтибит. Ол курдук литературнай музей  суруйааччы оҕолорго аналлаах  айымньыларынан алтынньы 17 күнүгэр  литературнай квиз-оонньууну,  сэтинньи 29 күнүгэр дьиэ кэргэн күрэҕин ыытта. Бу бу күрэххэ оҕолор оҥоһук оҥорон аҕалан  көмүскээтилэр, айымньы ис хоһоонун кылгастык кэпсээтилэр. Ону таһынан Тимофей Сметанин айымньыларын  дьиэ кэргэнинэн аахтылар. Холобура, “Куоскалар уонна саһыл” үгэни эдьийдии-балыстыы Третьяковалар ийэлэрин кытта аахтылар уонна   атын киһиэхэ эрэнимэ, бэйэҕэр эрэ эрэн» диэн айымньы түмүк санаатын эттилэр уонна ол санааны олохпутугар туһанар буолуохпут дэстилэр. Онон бу айымньы оҕоҕо, урууга туох санааттан суруллубутун биллилэр.

Онон күрэх түмүгүнэн 1 миэстэ Куличкиннар дьиэ кэргэн (26 оскуола). Манна дьиэ кэргэн аҕа баһылыга Куличкин Сергей Семенович  биэс оҕотунаан сэрии тематыгар  плакатнай уруһуйдарынан, ону таһынан доргуччу хоһоон аахтылар, ырыа ыллаатылар.

2-с миэстэ  Павловтар дьиэ кэргэн  ийэлэрэ икки кыыһын Дайааналаах Сандаара, уолун Эрханы кытта “Саллаат сүрэҕэ” айымньыны дьүһүйэн көрдөрдүлэр. (17 оскуола).

3 миэстэни Стручковтар дьиэ кэргэн. Айыы Куо (3 “в”), Айсена (уһуйаан) ийэлэринээн   “Күөрэгэй” остуоруйаны кукольнай театр оҥорон туруоран оонньоон көрдөрдүлэр.

Ону таһынан Чичигинаров Петя 3 (в, 17 оскуола) эбэтин Елизавета Ивановна Матвееваны кытта “Кыыллар үҥкүүлэрэ” хоһоону, Шестакова Камилла (5 д, 20 оскуола) ийэтэ Тополина Октябрина Власьевналыын суруйааччы Т.Сметанин туһунан ийэлээх оҕо кэпсэтиилэринэн олус үчүгэйдик толкуйдаан туруоран бары да астынныбыт.

Оҥоһуктарга 1 миэстэни Третьякова Туйаара,  Айаана (3 в, 17 оскуола),  2 миэстэ Саввинова Анисия (2 г, 17 оскуола), 3 миэстэни Гоголева Айаана  (7 г, 17 оскуола) ыллылар. Уонна бары кыттыбыт оҕолор анал аат ылан үөрдүлэр-көттүлэр.

Бу күрэхпит бастакы чааһыгар оҕолорго, төрөппүттэргэ анаан үөрүүлээх дьикти түгэн буолла. Манна буойун суруйааччы соҕотох кыыһа, Татьяна Тимофеевна уонна суруйааччы бииргэ төрөөбүт балта Екатерина Егоровна күндү ыалдьыттар буолан оҕолордуун көрсөн, сэһэргэһэн бардылар. Татьяна Тимофеевна: «Мин аҕам, убайым айымньылара өлбөт-сүппэт үөстээх айымньылар, онон өссө да эһиги ааҕыҥ, тылгытын-өскүтүн байытыҥ» диэн кэс тылларын эттэ. 80-ттан тахсыбыт саастаах балта Екатерина Егоровна: “Мин убайбын сэриигэ барарыгар уһун соннооҕун, оччолорго олох кыра буоламмын көтөхтөрө сылдьарбын өйдүүбүн” диэн ахтан ааста.  Музей научнай үлэһитэ, суруйааччы  Н.Е.Винокуров-Урсун ким да соччо билбэт түгэниттэн, кэпсээн-ипсээн күрэхпит бастакы чааһа сэргэхтик ааста.

Оҕо төрөппүтүн кытта  киэһээ дьиэлэригэр бэлэмнэнэн айымньыны ааҕан оҥоһук оҥоруулара, ааҕан нойосуустаан бэлэмнэниилэрэ – бу ааҕыыга көҕүлээһин биир ньымата буоллаҕа, оттон сыанаҕа тахсан   бииргэ буолуулара, таҥастарын-саптарын, атрибутикаларын оҥостуулара – бу бэйэтэ туспа үөрүү-көтүү, долгуйуу уонна умнуллубат түгэн дии саныыбыт. Бу күрэххэ кыттыбыт бары төрөппүттэргэ, учууталларга, кылаас салайааччыларыгар махталбытын тиэрдэбит.

Бу күрэҕи иилээн-саҕалаан Е.В.Дохунаев ыытта, жюрига Егорова С.А., Кузьмина А.А., Халгаева Н.В олордулар. Хаартыскаҕа Виталий Слепцов түһэрдэ.