Ытык киһибит, норуодунай суруйааччы, Социалистическай Үлэ Геройа Д.К.Сивцев-Суорун Омоллоон төрөөбүтэ 110 сылынан балаҕан ыйын 8-9 күннэригэр “Тааттаҕа сайдыы аартыга” диэн  Таатта Чөркөөҕүнэн,  Ытык Күөлүнэн улахан тэрээһин буолан ааста.

dsc_0015

Ыраахтан-чугастан саха саарына Суорун Омоллоон аатын ааттаан сүгүрүйэ  элбэх киһи тоҕуоруста: Суорун Омоллоон  сиэн оҕолоро, аймахтара, норуодунай суруйааччылар  Н.И. Харлампьева, С.А.Попов-Сэмэн Тумат, драматург  В.Е.Васильев-Харысхал,  СӨ Бырабыыталыстыбатын бэрэссэдээтэлэ А.П. Дьячковскай, СӨ көрдөрөр иһитиннэрэр хампаанньатын гендиректора И.М. Андросов, СӨ Уһук Илиҥҥи уокурукка бэрэстэбиитэлэ Г.Д.Никонов, улуус нэһилиэктэрин  баһылыктара, учууталлар сырыттылар.       Республика салалтатыттан  Ю. С. Куприянов бу үөрүүлээх түгэҥҥэ бастыҥ суруйааччыга Суорун Омоллоон аатынан государственнай бириэмийэ туттарыллыаҕа  диэн эттэ.  Күн иккис аҥарыгар Д.К.Сивцев-Суорун Омоллоон арыйбыт аартыгынан экскурсия уонна “Сайдыы аартыга: ааспыт үйэ уонна саҥа кэм” диэн ураһа иһигэр оллоонноон олорон  ирэ-хоро кэпсэтии, сэһэргэһии буолла.

dsc_0034

Суорун  Омоллоон  инникини   өтө көрөн, норуот бэйэтэ тутан-хабан олорон көрөрүн-истэрин,   салгыы сайыннарарын туһугар   музейдары тэрийэн хаалларбытын бары билэбит. Ол курдук 1977 с.  –  Чөркөөхтөөҕү историко-мемориальнай политическай сыылка музейын (урукку аата  “Якутская политссылка”  Чөркөөхтөөҕү мемориальнай музей), 1987 с. – Ленскэйдээҕи историко-архитектурнай “Доҕордоһуу”   музей-заповеднигын,  2001 с. –  Ытык-Күөллээҕи “Таатта” литературнай-художественнай музей-заповеднигын тэрийбитэ.  Ону таһынан 1970 с-хха  П.А.Ойуунускай аатынан литературнай музей тематическай-экспозиционнай былаанын оҥорбута, музейы   тэрийсибитэ.

dsc_0043

Н.Е.Попов директордаах Чөркөөхтөөҕү музей бу үбүлүөйдээх күнү көрсө “Всегда шел вперед, опережая время”  Дмитрий Кононович    олоҕун  суолун көрдөрөн кинини суруйааччы,  краевед эрэ быһыытынан буолбакка саха норуотун сайдар суолларын ыйбытын кэпсиир үгүс интэриэһинэй хаартыскалардаах, киһи элбэҕи билэр-көрөр быыстапкатын,  ону таһынан Суорун Омоллоон  тус бэйэтэ тутан-хабан булбут-талбыт мас иһитттэрин, музей бастакы экспонаттарын көрдөрүүгэ таһаарда.

dsc_0036

Иккис күн Ытык-Күөлгэ Хадаайы литературнай-художественнай музей-заповедник тэлгэһэтигэр Суорун Омоллоон пааматынньыгар тыыннаах сибэкки ууруута ыытылынна.  Кэрэ  айылҕалаах бу музей-заповедник саамай көстүүлээх сиригэр ытык киһибит Суорун Омоллоон дьиэ уһаайбата    арыллыыта буолла.  Бу 2 этээстээх  дьиэни  2001 с-хха балаҕан ыйын 14 күнүгэр төрөөбүт  улууһун  дьоно-сэргэтэ  Суорун Омоллооҥҥо бэлэх быһыытынан тутан биэрбит. Музей дьиэ бастакы экспонатын  Гуманитарнай чинчийэр институтун   Г.П.Башарин музейын научнай сотруднига Илья Васильев эһэтин Суорун Омоллоон малыттан казах домбратын бэлэхтээтэ.

dsc_0130

Бу кэнниттэн саха литературатыгар комедия жанрын бастакынан киллэрбит, саха литературатын төрүттээччилэриттэн биирдэстэрэ Н.Д.Неустроев дьиэтин арыйыы буолла.  Бу  дьонун дьиэтин Уус-Тааттаттан көһөрөн аҕалан туппуттар. Н.Д.Неустроев аҕатын өттүнэн аймаҕа,  84 саастаах ытык кырдьаҕас Максимова Екатерина Васильевна музейга  бэлэхтээбит суруйааччы чэрэниилэтин приборун уонна Неустроевтар аҕаларын өттүнэн төрүччүтүн кэпсиир суруктаах остуолун  туһунан кэпсээтэ.

dsc_0234

Д.К.Сивцев-Суорун Омоллоон аһаҕас халлаан анныгар оҥорон, туттаран хаалларбыт музейдара  историяны  ситимнээн өссө да сайда, кэҥии турдуннар, саха литературатын суолун солообут, саха баай духуобунай култууратын үөдүппүт, сайыннарбыт  ытык дьоммут үөскээбит кырыс сирдэрэ, олохторо дьон өйүгэр-санаатыгар   көлүөнэттэн көлүөнэҕэ баран истин.

Нюргуяна Халгаева