Биология наукатын кандидаата, фотограф, театровед В.Н. Дохунаев туһунан тэрээһин буолла. Түмэл дириэктэрэ Николай Лугинов саханы саха дэппит интэллигиэнсийэ төрөөн-үөскээн иитиллэн тахсарыгар төһүү күүс буолбут эйгэни үөрэтэр бырайыак түмэлгэ быйылгы сылтан чинчийэр үлэ сүрүн хайысхатын быһыытынан үлэлээн эрэрин туһунан эттэ. Онуоха бу бастакы тэрээһин буолар. В.Н.Дохунаев уһулуччулаах учуонай, суруналыыс, фотограф буоларын, бэртээхэй киһитин туһунан киэҥ кэпсэтии буолла. Кэлбит дьон бу кэскиллээх бырайыак саҕаламмытын улаханнык сэҥээрдилэр. Саха тыйаатырдара, бииргэ үлэлээбит учуонайдара, биир дойдулаахтара кэлбиттэр. Холобур, Павлов Николай Ермеевич диэн наука дуоктара олус учугэй ахтыыны онордо.
СӨ норуодунай артыыһа Ефим Степанов: “Эр соҕотох соҕотоҕун дьоруой буолбат. Василий Николаевич “Хаарыан хампа күөх кытылым” испэктээк судаарыстыбаннай бириэмийэҕэ тиийэ билиниигэ тиийэригэр батыһа сылдьан хаартыскаҕа омук сирдэринэн сылдьан түһэртээн, суруйан үйэтитэн хаалларбыта. Ааһан истэҕиҥ аайы бөдөҥөөн суолтата күүһүрэн иһиэҕэ диэн этэрэ. Саха тыйаатырын устуоруйатын антологията тахсан кини аата үйэтитиллибитэ. Тыйаатыр сүгүрүйээччитэ, атаһа, өрө анньааччыта буолар этэ”, – диэн санаатын эттэ.
Ангелина Кузьмина