Саха Өрөспүүбүлүкэтин суруйааччыларын Сойууһун чилиэнэ, 10 кинигэ, Бүлүү куоратын Өрөгөйүн ырыатын (Гимнин) автора, 5 өрөспүүбүлүкэтээҕи сабыылаах күрэхтэр кыайыылаахтара, «Бүлүү саһарҕалара» литературнай түмсүү салайааччыта СӨ үлэ бэтэрээнэ, сэрии кэмин оҕото ИВАНОВ НИКОЛАЙ ИВАНОВИЧ 75 сааһыгар аналлаах «Мин саха буолан киэн туттабын» диэн ааҕааччыларын кытта көрсүһүүтэ буолла.

 

Николай Иванович 1945 сыллаахха, дьиҥинэн, кулун тутар ый 16 күнүгэр Бөкчөҥөө нэһилиэгин Элэмтэтин Кунакытыгар Төгүрүк алааска күн сирин көрбүтэ. Оччолорго төһө буолан баран эбитэ буолла, таайа Былатыан Сэбиэккэ суруттарарыгар кулун тутар 10 күнэ диэн суруттаран кээспитинэн докумуоҥҥа оннук сылдьар.
Николай Иванович төрүт удьуора Моттойдор диэн. Ииппит, улаатыннарбыт, саамай күндү киһитэ Эһэтэ Моттой Эҥэнтэй эдэр сылдьан атаҕын айаҕа ыттаран аҥар атаҕа суох да буоллар төрүт түөлбэтигэр сир түннүгүнэн, бөлүһүөгүнэн биллэр ытык киһи этэ. Бэйэтэ туспа баай остуоруйа. Кини 8 оҕолооҕо. Кэргэнэ Александра Руфовна Бүлүү Сыдыбылыттан төрүттээҕэ. Сэрии кэмигэр икки уола сураҕа суох сүппүтүн, биир уола балыырга түбэһиннэрэн хаайыллыбытын, кыра уолун икки төгүл сэриигэ ыҥыра сылдьыбыттарын да тулуйбакка буолаахтыа сэрии ол ыар сылларыгар күн сириттэн күрэнээхтээбитэ. Оттон Ньукулай ийэтэ уолун төрөтөөт тымныйан ыалдьан үйэтин тухары инбэлиит этэ.
Бүлүү орто оскуолатын, Дьокуускайдааҕы тыа хаһаайыстыбатын салайар кадрдарын бэлэмниир техникуму, Н.М.Шверник аатынан Бүтүн Россиятааҕы үрдүкү профсоюзнай оскуола Дальнай Востоктааҕы филиалын бүтэрбитэ.
Үлэтин уопсай ыстааһа 56 сыл, ол иһигэр тыа хаһаайыстыбатын салаатыгар, Степан Аржаков аатынан совхозка сүөһү иитиитин биригэдьиириттэн, зоотехнигыттан саҕалаан совхоз директорын хаһаайыстыбаннай чааска солбуйааччынан 36 сыл, Бүлүүтээҕи 31 №-дээх СПТУ директорынан, С. М. Аржаков аатынан Бүлүүтээҕи оҕо Дьиэтин директорын хаһаайыстыбаннай чааска солбуйааччынан, сельскэй уһаайбатын сэбиэдиссэйинэн, Албан Аат музейын сэбиэдиссэйинэн үлэлээбитэ.
Аҕыйах хонуктааҕыта Бүлүүгэ төрөөбүт күнүн, Россияҕа Өйдөбүнньүк уонна Албан аат, Саха сиригэр Патриотизм, Бүлүү улууһугар Улуу Кыайыы, Бүлүү куоратыгар норуот хоодуот быһыытын сылларын чэрчилэринэн Николай Иванович айар үлэтин түһүлгэтэ буолбута. Онно кини хоһооннорун, кэпсээннэрин, сценическэй айымньыларын, ырыа буолбут хоһооннорун 120 кыттааччы “Мин саха буолан киэн туттабын”, “Өй-сүрэх түгэҕэр тыыннаахтар”, “Кэрэ олох таптал тыыннаах”, “Кэпсээннэр”, “Улуука кэс тыла”, «Ырыа буолбут хоһооннор» түһүмэхтэринэн көрдөрбүттэрэ.
Поэттар хоһоонноро ырыа буолан кынаттанан көтүүлэрэ – айар үлэлэрин биир үрдүк үөрүүтэ буолар. Николай Иванович 30-ча хоһоонноругар ырыа айааччылар матыып айдылар, ырыаһыттар ыллыы сылдьаллар. 1964 сыллаахха суруйбут бастакы хоһоонноруттан биир хоһоону таба көрөн бастакы ырыаны саха народнай артыыската Анастасия Варламова суруйбута. Хастыы да ырыаны самодеятельнай композитордар, мелодистар Егор Поликарпов, Иван Туласынов, Алексей Васильев, Марина Гуляева, Эрхаан суруйбуттара. Егор Кампеев, Анатолий Бурнашов, Сергей Иванов, Станислав Луковцев, Петр Кобельянов, Александр Комаров биирдии ырыалаахтар.
Автор киэн туттуутунан 2007 сыллаахха Николай Иванович тылларыгар, Алексей Васильев мелодиятыгар Бүлүү куоратын Өрөгөйүн ырыата (Гимнэ) бигэргэтиллибитэ.