Литература түмэлин кэлэктиибэ үүнээри турар Саҥа 2020 сылынан истиҥник эҕэрдэлиибит! Саҥа сыл саҥа үөрүүлэри, ситиһиилэри аҕалыахтын, бар дьоммут чэгиэн-чэбдик буолуҥ диэн баҕаран тураммыт түмэлгэ Саҥа дьыллааҕы быыстапканы кэлэн көрөргүтүгэр ыҥырабыт! Саҥа дьылынан, саҥа сылынан! Уруй-айхал, тускуо буолуохтун!

 

Саҥа Дьыл

Саҥалыыра дьылларбыт
Салаллан-тэлэллэн кэлиитигэр
Сайаҕас дьэллэм тылынан
Саҥара-иҥэрэ тоһуйуоҕуҥ!

Үчүгэйдиир үйэлэрбит
Үүнэн тахсан кэлиитигэр
Үмүөрүһэн тураммыт
Үөрэн-көтөн көрсүөҕүҥ!

Көмнөх хаарбыт анныттан
Көрдөөх-нардаах дьылларбыт
Күөрэйэн тахсан кэлиитигэр
Күлэн-оонньоон керсүөҕүҥ!

Дьолу-соргуну уһаттын,
Дьоллоох олоҕу кэҥэттин
Дьону-сэргэни холбоотун,
Дьолу-тускулу тупсардын!

Алгыс баһын салайдын,
Айылгы төбөтүн арыйдын,
Абырал баһын айхаллаан
Айдааран ахтан иһиэҕиҥ!

Сайаҕас ыччат оҕолорго
Сахалыы саҥарбыт саҥабыт
Саҥа үөскүүр дьоннорго
Сатараан, үксээн иһилиннин!

Алампа

 

Саҥа дьыл

Иван Туласынов

Саҥа Дьылбыт кэлиитэ
Тоҕо бэрдэй, кэрэтэй,
Күлүмүрдүүр харыйа
Кэрэ дьикти оонньуурдаах.

Саҥа Дьыл Саҥа Дьыл
Дьикти кэрэ Саҥа Дьыл
Куба маҥан хаары ыһан,
Кэллэ кэрэ да киэһэ,
Көмүс, алмааас уотун тиһэн,
Кэллэ Саҥа Дьыл киэһэ.

Сэгээр, бүгүн олус сырдык,
Бүгүн олус да кэрэ,
Кимнээх эрэ таптаһар
Иэйиилэрин уматтыҥ.

Саҥа дьылбыт кэлиитин
Өрөгөйдүү көрсүөҕүҥ,
Сырдык, кэрэ санаанан
Салайтарар буолуоҕуҥ!