Саха Сэбиэскэй литературатын төрүттээбит суруйааччы, Саха судаарыстыбаннаһын тэрийсибит, XX үйэ саҥатыгар олох-дьаһах чыҥха уларыйыытын оҥорсубут уһулуччулаах политическэй диэйэтэл, лингвист-учуонай, наука салайааччыта Былатыан Ойуунускай төрөөбүт күнүгэр пааматынньыгар (Орджоникидзе болуоссата) сибэкки дьөрбөтүн ууруу буолла.

Ол кэнниттэн П.А. Ойуунускай аатынан литература судаарыстыбаннай түмэлигэр фольклорист, литературовед, тыл үөрэҕин хандьыдаата, СӨ култууратын үтүөлээх үлэһитэ Сардана Платоновна Ойунская төрөөбүтэ 85 сылыгар аналлаах тэрээһин буолла. Наталья Ивановна Харлампьева, Николай Алексеевич Лугинов эҕэрдэ тылы эттилэр. Филология билимин хандьыдаата Лидия Николаевна Романова манныгы бэлиэтээн эттэ:

— С.П. Ойунская 1962 с. университеты бүтэрэн баран харыс да халбарыйбакка саха таабырыннарын, олоҥхо-тойуктары чинчийбитэ. Дуоктар буолар үлэтин кыайан оҥорбокко хаалбыта. 1988 с. литература отделыгар көһөн П.А. Ойуунускай нэһилиэстибэтин үөрэтиигэ үлэлээбитэ. Ол кэмҥэ «Мин аатым ааттаныа», «П.А.Ойунский через века» о.д.а элбэх кинигэлэр тахсыбыттара. Дириэктэр В.Н.Иванов көҕүлээн күүстээх үлэ барбыта. Санаата саамай туолбут кинигэтэ. «Аҕам сырдык аата» диэн үлэтэ улахан суолталаах үлэ. Ойуунускайы таҥара оҥостубут, ыарахан кэмнэригэр көмөлөспүт дьонун, атаҕастаммыт кыһыытын, абатын барытын түмэн киллэрбитэ. Кэриэс кинигэтэ этэ. Сардаана Платоновна бэйэтин ураты истииллээх суруйааччы быһыытынан көрдөрбүтэ. Дьүһүйүү поэмаларыгар тохтоон ааһыахпын баҕарабын. «Хоочугур уола Былатыан» поэмаҕа аҕатын төрдүттэн-ууһуттан саҕалаан тиһэх күннэригэр диэри суруйар. «Дойдум Таатта дорообо” тыла-өһө сыыйыллаҕаһынан, нарынынан норуот ырыатын санатар. “Разговор с отцом» ис тэтиминэн лирическэй проза диэххэ сөп.

Елена Васильевна Слепцова “Син биир буолбаат” П.А.Ойуунускайга анаммыт хоһоонун аахта. Аймахтарыттан Зоя Егоровна Соловьева, Мария Сергеевна Соловьева, Мария Степановна Саввина о.д.а. сырыттылар. Анна Егоровна уонна Николай Николаевич Павловтар «Ахтан-санаан ааһыаҕыҥ» диэн Н.Н. Павлов-Тыаһыт төрөөбүтэ 115 сылыгар анаан таһаартарбыт кинигэлэрэ сүрэхтэниэ. Учуонайдар, суруйааччылар “Таатта түмсүү” салайааччыта Владимир Владимирович Аржаков о.д.а. сылдьан эттилэр-тыыннылар.