Саха Өрөспүүбүлүкэтин Судаарыстыбаннаһын күнүн бэлиэтээһин чэрчитинэн, П.А. Ойуунускай аатынан литература судаарыстыбаннай түмэлигэр норуодунай суруйааччы, уопсастыбаннай-бэлитиичэскэй диэйэтэл Андрей Васильевич Кривошапкины кытта көрсүһүү буолуоҕа.

Кини 1940 с. алтынньы 17 күнүгэр Саккырыыр оройуонугар (билигин Эбээн-Бытантай улууһун сирэ) Сэбээн Күөл сэлиэнньэҕэ көс олохтоох табаһыт дьиэ кэргэнигэр төрөөбүтэ. Аҕата эрдэ өлөн, ийэтэ оҕолорун соҕотоҕун иитэн, атахтарыгар туруорбут. Сэбээн Күөл, Саккырыыр оскуолаларыгар ситиһилээхтик үөрэммитэ. Оскуолаҕа үөрэнэр сылларыгар дьону түмэр, сирдиир хаачыстыбалара биллибиттэрэ: пионер эрдэҕинэ — дружина сэбиэтин бэрэссэдээтэлэ, үрдүкү кылаастарга — оскуолатын хомсомуолун тэрилтэтигэр сэкиритээр, оскуола уонна бөһүөлэк олоҕор көхтөөхтүк кыттара.

Сэбээн Күөл оскуолатыгар үөрэнэ сылдьан, саха тылын бэйэтин тылын курдук баһылаабыта. Оччотооҕу кэмҥэ эдэр суруйааччы, алын кылаас учууталын Платон Ламутскайы кытта билсибитэ. Ити кэмтэн литература эйгэтигэр тардыһар буолбута. Бастакы хоһооннорун, кыра кэпсээннэри суруйарга холоммута. Доҕорун Вася Кейметиновтыын суругунан Василий Дмитриевич Лебедевы кытта билсибиттэр. Суруйааччы идэтин баһылыылларыгар сүбэ-ама көрдөөбүттэр. В.Д. Лебедев оҕолорго төрөөбүт тылларын, эбээн фольклорун таһыччы билиэхтээхтэрин, үөрэтиэхтээхтэрин, бары өттүттэн дэгиттэр билиилээх дьон буолуохтаахтарын туһунан ыйбыт-алҕаабыт. Учуонай суруга, сүбэлэрэ, уолаттар инники дьылҕаларыгар улахан сабыдыалланан, сирдьит буолан, кинилэри биллиилээх суруйааччы буолалларыгар түстээбит…

Сэһэннэрэ: “Оҕо сааһым табалара” (1985 с.), “Чубукулар хоту түһэллэр (1985 с.). Арамааннара: “Дьылҕам кытыла” (1990 с.), “Көмүс таба” (1990 с.), “Муома сис хайата” (2010 с.).

Буолар күнэ, бириэмэтэ: балаҕан ыйын 26 күнэ, 11.00 чаастан.

Аадырыһа: Дьокуускай, Октябрьскай уул., 10, төл. 428912

Киириитэ: