Олоҥхо 10 сылын түмүктүүр тэрээһин чэрчитинэн сэтинньи 25 күнүгэр Саха сирин бриллиантовай циркатын дьиэтигэр олоҥхоҕо аналлаах быыстапкалара буолан ааста. Быыстапка күнүс 14.00 – 18.00 ч. диэри ыытылынна.

Б. Ойуунускай аатынан Литературнай музей СР норуотун маастара Барҕа Баһылай – Спиридонов Василий Иванович оҥорбут “Олоҥхо” дьүһүйүүтүнэн, маска оҥоһуктарынан быыстапкаҕа кыттыбыта олус сэргэхтик барда. Манна үөһээ, аллараа, орто дойду алтыһыыларын көрдөрөр 100-чэкэ персонажтаах “Олоҥхо” диэн композиция, Дьулуруйар Ньургун Боотур олоҥхо 8 ырыатыгар оҥоһуллубут тус-туспа оҥоһуктар, “Ньургун Боотур – Саха кыайыы саллаата” композиция, “Хомус хоһуйуута”, саха фольклорунан оҥоһуллубут үлэлэр киирдилэр. Көрөөччүлэр сүҥкэн биһирэбиллэрин ыллылыр, авторга махталларын эттилэр, саха да дьонугар уус тарбахтаах, мындыр өйдөөх, талба талааннаах дьон баарын сөхтүлэр. Василий Ивановичтан көрөөччүлэр аҕырымнаабыттарыгар хас да ыйытыыга хоруйдууругар көрдөстүм.

— Хантан хааннааххын, кимтэн кииннээххин кылгастык билиһиннэрэ түһүөн ду?

— Үөһээ Бүлүүгэ тохсунньу тоһуттар тымныытыгар 14 чыыһылаҕа 1950 с. күн сирин көрбүтүм. Аҕам уот сэрии кыттыылааҕа. Эһэм олоҥхоһут Биэчэрэ оҕонньор олоҥхолорун истэн улааппытым. Ол сорох персонажтарын бу “Олоҥхо” диэн үлэбэр көрөҕүт.

— Үлэҕэр хайдах ылсаҕын?

— Маҥнай сылдьан наар өйбөр оҥорон көрөбүн, ол бэйэм санаабар оҥорорбунааҕар аҕыйаҕа суох бириэмэни ылар уонна эскиһэ да, макета да суох кыспытынан барабын.

— Ханнык инструменнары туттаҕын?

— (күлэр) Үксүгэр бэйэм быһахтарбынан, быһар-отойор тэриллэрбинэн оҥоробун, кыракый буурунан эмиэ туттабын. Туттар тэрил сытыыта элбэҕи быһаарар.

— Ханна, хаһан бу үлэҕэ ылсыбыккыный?

— Хойутаан саҕалаабыппын диэн кэмсинэбин. Абый улууһугар үлэлии сылдьан саҕалаабытым. Хатыҥ маһынан оҥоробун. Ити эрээри хатыҥ да араастаах, холобур, бу Абый сирин хатыҥнара, оттон бу (кэнники оҥоһуктарын көрдөрөр) маннааҕылар. Хоту дойду хатыҥнара кытаанах, киил буолаллар, үгүс тыалга, буурҕаҕа “үөрэммит, эрэйдэммит” мастар, ол оҥорорго өссө үчүгэйдэр, алдьамматтар, кыһарга эрэ эрэйдээх соҕус.

— Инникитин туох былааннааххыный?

— Үлэм быыһыгар саха фольклорун тематыгар монументальнай улахан оҥоһуктарга ылсыһыам этэ.

— Кэпсээниҥ иһин махтал, айар үлэҕэр ситиһиилэри баҕарабын!

Егор Дохунаев – Наҕыл,

Б. Ойуунскай аатынан Литературнай музей үлэһитэ.

1 2 3 4 7 8 9