Алтынньы 11 күнүгэр Саха сирин суруйааччыларын биэс сылга биирдэ ыытыллар XVII сийиэстэрэ буолан ааста.

Быйыл хаһааҥҥытааҕар да элбэх суруйааччы кыттыыны ылла. Сойуус 79 чилиэннээҕиттэн, ыраах олорор, айаҥҥа сылдьар уонна ыалдьан сытар дьонтон ураты, 73 киһи кэлбит. Оннооҕор эбээн суруйааччыта Мария Федотова-Нулгынэт хоту Муоматтан анаан-минээн көтөн кэлбит.

Сийиэс кыттыылаахтарын вице-премьер Ольга Балабкина, ыччат миниистирэ Степан Саргыдаев, култуура миниистирин солбуйааччы Николай Макаров эҕэрдэлээтилэр.

Биэс сыллаах үлэни отчуоттаан, сойуус бэрэссэдээтэлэ Наталья Харлампьева улахан дакылааты аахта. Бу кэмҥэ литературнай эйгэҕэ элбэх тэрээһиннэр буолбуттар. 2015 сыллаахха дойду үрдүнэн ыытыллыбыт Литература сыла Саха сиригэр ордук тэрээһиннээхтик ыытыллыбыта, уопсастыба бары араҥатыгар хамсааһыны таһаарбыта. Арассыыйа Суруйааччыларын сойууһун көһө сылдьар пленума Дьокуускайга буолбута. Сойуус бэрэссэдээтэлэ Валерий Ганичев Саха сирин “Литература сылын киининэн” ааттаабыта.

“Үрүҥ хаар алгыһа” диэн норуоттар икки ардыларынааҕы бэстибээл бу кэм устата үстэ ыытыллан, атын дойдулартан, уобаластартан элбэх суруйааччылар, тылбаасчыттар, кириитиктэр ыалдьыттаабыттара. Ол түмүгэр Польша уонна татаар литератураларын антологиялара сахалыы тылынан тахсыбыттара. “Саха сирин суруйааччылара” ассоциация тэриллэн, икки сойууһу түмэн,  өрөспүүбүлүкэ тас өттүгэр суруйааччылары, литератураны таһаарар үлэтин саҕалаабыта.

Кэнники кэмҥэ сойууска 14 саҥа чилиэн киирдэ. Эдэр литератордар сэбиэттэрэ тэриллэн, 28 кинигэни, 7 хомуурунньугу таһаарбыттар. Эдэр суруйааччылар сүбэ-мунньахтара үс төгүл, саҥа саҕалааччылары үөрэтэр сэминээр иккитэ ыытыллыбыт. Манна эдэрдэр бэйэлэрэ ылсан, тэрээһинигэр сүүрэн-көтөн ыыталлара бэлиэтэннэ.

“Бичик” кинигэ кыһатын кытары бииргэ үлэлэһэн, классик суруйааччылар кинигэлэрин 65 тома тахсыбыт.

Наталья Ивановна баар кыһалҕалары эмиэ таарыйда. Сойуус өрөспүүбүлүкэ бүддьүөтүттэн бэриллэр 700 тыһ.солк. кэриҥэ грант ылан, үбүлэнэ олорбут буоллаҕына, быйыл биэрбэтэхтэр. Оттон сойуус  дьиэтэ эргэрэн, үрдэ алдьанан, хапытаалынай өрөмүөнү эрэйэр буолбут. Эһиил ыытыллыахтаах “Үрүҥ хаар алгыһа” норуоттар икки ардыларынааҕы бэстибээл тэриллэр үбүлээһинэ биллибэт, бырабыыталыстыба тэрээһиннэрин былааныгар киирбэтэх. Классик суруйааччылар айымньыларын бэчээттиир “Бичик” кинигэ кыһатын уонна “Чолбон” литературнай сурунаал (“Сэмсэ” сыһыарыыта тахсарыгар) үбүлээһиннэрэ эмиэ сарбыллыбыт. Онон бу хайысханан бырабыыталыстыба саҥа салалтатын кытары түмүктээх үлэ күүтэр.

12 киһи тыл эппитин кэнниттэн, сийиэс резолюциятын ылыннылар. Манна үбүлээһин боппуруоһун быһаарарга, классиктары кытары үлэни салгыырга, эдэрдэри кытары үлэни күүһүрдэргэ, уопсастыбаннай хамсааһыннарга көхтөөхтүк кыттарга, “Үрүҥ хаар алгыһа” бэстибээли ыытарга, ини-бии Даниловтар пааматынньыктарын туруорарга үлэлэһэргэ, Былатыан Ойуунускай аатын үйэтитэргэ үлэни ыытарга, уо.д.а. этиилэри ылыннылар.

 

Куоластааһын

Күн иккис аҥарыгар дэлэгээттэр боломуочуйа болдьоҕо бүтэринэн, сойуус бырабылыанньатын саҥа састаабын уонна бэрэссэдээтэлин таллылар. Кистэлэҥ куоластааһын түмүгүнэн, Наталья Харлампьева 100% куолаһы ылан, Саха сирин суруйааччыларын сойууһун бэрэссэдээтэлинэн өссө төгүл талылынна. Бырабылыанньаҕа норуодунай суруйааччылар Николай Лугинов, Сэмэн Тумат, прозаик уонна бэйиэт Елена Слепцова-Куорсуннаах, драматург Баһылай Харысхал, Гаврил Андросов, Ольга Пашкевич, Рустам Каженкин, Степан Сивцев-Хамалҕа, Аграфена Кузьмина талылыннылар.

Ревизиялыыр хамыыһыйаҕа Данил Макеев, Зинаида Архипова, Владимир Пестерев киирдилэр. Ону тэҥэ сойуус Ытык Сүбэтигэр (“Совет старейшин”) Павел Харитонов-Ойукуну, Николай Винокуров-Урсуну, Петр Максимовы таллылар.

Ангелина Васильева, “Саха сирэ” хаһыат, edersaas.ru

Наталья Харлампьева вновь избрана председателем Союза писателей Якутии

11 октября в актовом зале Академии наук состоялся 17-й съезд Союза писателей Якутии.

Участников съезда поприветствовали вице-премьер правительства республики Ольга Балабкина, министр молодежи Степан Саргыдаев, заместитель министра культуры Николай Макаров.

С основным и очень обстоятельным докладом, охватывающим пятилетний период с момента проведения последнего съезда, выступила народный поэт Якутии, председатель Союза писателей Якутии Наталья Харлампьева. Она отметила, что за последние пять лет, возглавляемый ею Союз, пополнился 14-тью новыми членами. Cоздан Совет молодых литераторов, ими издано 19 книг, 7 сборников. Проведено 3 раза совещание молодых писателей, и 2 обучающих семинара. Также издано 65 томов произведений писателей-классиков в издательстве “Бичик”. Трижды провели международный фестиваль “Благодать большого снега”, в результате изданы антологии польской и татарской литератур на якутском языке.

В связи с истечением срока полномочий, во второй половине дня участники съезда избрали нового председателя Союза писателей Якутии. В результате проведения  тайного голосования,  народный поэт Якутии Наталья Харлампьева единогласно вновь избрана председателем Союза писателей Якутии.Кроме этого, избран новый состав Правления Союза писателей Якутии, состоящий из 9 человек, куда помимо Натальи Ивановны, вошли народный писатель Якутии Николай Лугинов, прозаик и поэт Елена Слепцова-Куорсуннаах, поэт Ольга Пашкевич, драматург Василий Васильев–Харысхал, поэт, прозаик и критик Семен Попов–Тумат, поэт и журналист Гаврил Андросов, прозаик Аграфена Кузьмина, прозаик Степан Сивцев-Хамалҕа, поэт Рустам Каженкин.

В Совет старейшин союза избраны Павел Харитонов-Ойуку, Николай Винокуров-Урсун и Петр Максимов.

В ревизионную комиссию вошли Данил Макеев, Зинаида Архипова и Владимир Пестерев.