Улуу убайбыт Былатыан Ойуунускай төрөөбүтэ 125 сылынан куорат оскуолатын үөрэнээччилэригэр бу ааһан эрэр 2018 сылга  хоһоон ааҕыытын күрэҕэ, республикатааҕы оҕолор оҥоһуктарын  куонкурса, о.д.а. түмсүүлээх тэрээһиннэр буолан аастылар.    Биир оннук күрэх “Мин Ойуунускайым” диэн суруйааччы айымньыларыгар, олоҕун туһунан ахтыыларга олоҕуран дьүһүйүүгэ күрэх ахсынньы 10 күнүгэр 2018 с ыытылынна. Бу күрэх 2019 сылы көрсө Тыйаатыр сылыгар                                                                                                           ананна. Куоталаһыыны СР үтүөлээх артыыһа, Б.Ойуунускай аатынан судаарыстыбаннай бириэмийэ лауреата Е.В.Слепцова-Куорсуннаах бэрэссэдээтэллээх, ону сэргэ Ойуунускай аатынан Саха драматическай театрын артыыската Ньургуйаана Шадрина дьүүллүүр сүбэҕэ  үлэлээн түмүк таһаардылар. Бу тэрээһин саҕаланыытыгар Ойуунускай айымньыларынан  республикатааҕы оҥоһук күрэҕин түмүгүн үөрүүлээх быһыыга-майгыга туттарыы буолла.  Ол кэннэ    Ньургуйаана Шадрина  уһуйар оҕолорун  студията  Ойуунускай “Саһыллаах барсук” айымньытын оонньоон көрдөрбүттэрэ улахан сэҥээриини ылла.

Барыта 94 үөрэнээччи 7 оскуолаттан күрэхтэстилэр. Кыттааччылар аҥардас суруйааччы айымньытынан эрэ буолбакка Ойуунускай тус олоҕуттан ахтыыларга олоҕуран, олоҥхотуттан быһа тардан ыллаан-туойан, олоҥхо-тойгуттан, сэһэниттэн, кэпсээннэриттэн оонньоон туруордулар.

Ол курдук 23 №дээх оскуола 5 “б”, 6 “6” барыта 12 оҕо П.А.Ойуунускайдыын оонньообут, кинини үчүгэйдик билэр кырдьаҕас К.А.Слепцов “Платон оҕо эрдэҕинэ”, Амма Аччыгыйа “Үтүөкэннээх киһи” диэн ахтыыларыгар олоҕуран “Кэхтибэт кэскилбит кэрэлэнэн кэллэ” диэн 10 мүнүүтэлээх олус үчүгэй оонньууну көрдөрөн бастакы миэстэни ылыахтарын ыллылар, хайҕаннылар, салайааччы Кулакина Таисия Егоровна. Иккис миэстэни 7 №дээх оскуола 9-11  кылаас үөрэнээччилэрэ “Дьулуруйар Ньургун Боотур” олоҥхону  уон биир буолан олоҥхо сүрүн дьоруойдарын ырыаларын кылыһахтаах куолаһынан  киэргэтэн ыллаан-туойан кордөрдүлэр, салайааччы Петрова Жанна Николаевна. Ону тэҥэ 7№дээх 8 “з”  кылаастан 14 оҕо  Ойуунускай “Улуу Кудаҥсатын” айымньы ис хоһоонун  арыйан көрдөрдүлэр, салайааччы  Сорокоумова Саргылана Ивановна. Үһүс миэстэни үс хамаанда үллэһиннэ: 7 №дээх оскуола 8 “Ж” кылаастан 12 оҕо Ойуунускай хоһоонноруттан быһа тардан  аахтылар, 26№дээх  оскуола 6 “Д” кылаас үөрэнээччилэрэ, салайааччылар Пестерева Н.И., Борисова М.Н., Пестерева Е.Н. “Обуннаах оҕо”. “Өйдөөх оҕо”, “Оҕо куйуурдуу” турара” айымньылартан оонньоон көрдөрдүлэр уонна 7 № дээх оскуолаттан “Алгыс” фольклорнай студия оҕолоро “Ойуунускай кэриэһигэр” диэн уус-ураннык ааҕан, кэпсээн дьүһүйэн туруорбуттарын астына-биһирии көрдүбүт, салайааччы Антонова Евдокия Гаврильевна. Бу күрэххэ 7 нүөмэрдээх оскуолаттан  биэс кылаас – үс ахсыс, биир сэттис уонна онус кылаастан барыта 60-ча  үөрэнээччи кэлэн көхтөөхтүк кыттыбыттара бу олус үчүгэй.  Ону таһынан 31-с, 2-с нүөмэрдээх оскуола оҕолоро Ойуунускай айымньыларын ааҕан, үөрэтэн бэйэлэрин саастыы оҕолорго оонньоон көрдөрөн бу 2018 – Ойуунускай төрөөбүтэ 125 сылыгар Ойуунускай аатынан литературнай музейга кэлэн көхтөөхтүк кыттан хас биирдии кыттааччы  сүрэҕэр сүппэттик хааллаҕа Ойуунускай тыла-өһө, Ойуунускай үтүө аата-суола…