«Кэриэһим, кэннибэр хааларым

Кэхтибэт кэрэкэ тылларым…»

 

Былатыан Ойуунускай аатынан литературнай музейга поэт, прозаик, драматург, олоҥхоһут, саха бастакы лингвист учуонайа, биллэр судаарыстыбаннай диэтэлэ П.А. Ойуунускай төрөөбүтэ 125 сылынан «Кэриэһим, кэннибэр хааларым-кэхтибэт кэрэкэ тылларым» диэн ааттаах литературнай дьүһүйүү буолла. Кэлбит дьон санаатын маннык үллэстэр.

      

Дьокуускай куорат 2-с №-дээх национальнай политехническай орто оскуола 7-с кылааһын үөрэнээччилэрэ, кылаас салайааччыта Антонина Антоновна Ильина:

 

—Улуу убайбыт Былатыан Ойуунускай кэнэҕэс ыччакка суруйан хаалларбыт уоттаах-төлөннөөх суруйууларын, этиилэрин араас саастаах дьон толорууларын сэргээн көрдүбүт. Кэрэхсэбиллээх кэпсээннээх суруйааччыбыт Н.Е. Винокуров-Урсун Ойуунускай туһунан кэпсээнин долгуйа иһиттибит. Ойуунускай саҥа олох уоттаах ырыаһыта буолбутун, дьон-норуот санаата уларыйыытыгар сүҥкэн суолталааҕын ыйда.

Музей үлэһиттэрин көҕүлээһининэн «Ойуунускай төрөөбүт алааһын устун» саҥа бырайыагы илэ харахпытынан көрөн, бу Тохтобул алааска хаампыт курдук сананныбыт.

Бэлиэ тэрээһин ытык мааны ыалдьыта Е.В. Слепцова-Куорсуннаах, Е.П. Чехордуна дьикти кэпсээннэрин иһиттибит. Екатерина Петровна биһиэхэ  “барыбыт  сүрэҕэр Ойуунускай баар” диэн эттэ. “Кырдьык даҕаны” диэн үөрэ түстүбүт. Биһиги кини айымньыларын үөрэтэр буоламмыт, дьикти күүс уотун ылынар эбиппитин өйдөөтүбүт. Бииргэ үөрэнэр уолбут Айтал Амыдаев «Бырастыы» хоһоонун олус диэн долгуйан туран аахпытын киэн тутта иһиттибит. Ойуунускай сиэн кыыһа Куорсуннаах Ойуунускай туһунан кини дьиэ кэргэнигэр ураты сыһыанын истиҥник кэпсээтэ уонна суруйааччы «Син биир буолбаат!?» диэн дириҥ өйдөбүллээх хоһоону аахта.

Саха норуота сайдарын туһугар, кэнэҕэс ыччат кэскилин түстээн олоҕун толук уурбут Улуу киһибит Ойуунускай кэриэс-хомуруос  кэхтибэт кэрэкэ тыллара барыбытын долгутар, толкуйдатар сүдү суолталаахтар.

С.Ф. Гоголев аатынан Дьокуускайдааҕы педколледж алын кылаас учууталын бэлэмниир салаатын 2 кууруһун устудьуоннара:

 

Яковлева Сияна:

—Мин санаабар, бу Ойуунускай кэриэһигэр анаан тэриллибит литературнай дьүһүйүү киэһэтэ олус бэркэ ааста. Бу күн мин кини төрөөбүт алааһын, олорбут дьиэтин субу турардыы көрбүтүм. Ойуунускай хоһооннорун, кини эппит тылларын оҕолор олус истиҥник ааҕан иһитиннэрбиттэрин сүрдээҕин болҕойон, дуоһуйан иһиттим.

 

Кириллина Мони:

—П.А. Ойуунускай төрөөбүтэ 125 сылыгар анаммыт литературнай дьүһүйүү киэһэтигэр сылдьан астынным, биллиилээх поэппыт, прозаикпыт, киэн туттар киһибит туһунан билиим өссө кэҥээтэ, элбэҕи биллим. Холобур, бастаан ылына сылдьыбыт псевдонимнарын, тапталлааҕын Фекла туһунан сэргээтим.

 

Эверстова Аня:

—П.А.Ойуунскай туһунан ис киирбэхтик кэпсээтилэр, олоро сырыппыт балаҕанын моделлаан көрдөрбүттэрэ олус диэн интэриэһинэй эбит. Кини хоһооннорун оскуола оҕолоро бэрт үчүгэйдик аахтылар, кылгас сыаҥка туруорбуттарын дьон сэргээн көрбүтэ. Онон маннык тэрээһин ыытыллыбыта олус улахан суолталаах

 

 

 

Ангелина КУЗЬМИНА бэлэмнээтэ