Ахсынньы ый 27 күнүгэр 2015, литература сылын түмүктэниитигэр сөп түбэһиннэрэн Иван Гаврильевич Нелунов, П.А. Ойуунускай аатынан Литературнай музей үлэһитэ, “Күлүгүрбэт күлүктэр” диэн сүрүннээн ааспыт үйэтээҕи, билигин умнуллан эрэр хаартыскаларга түспүт  биирдиилээн дьон араас дьылҕалаах олохторо ойууланар, сырдатыллар кинигэтин сүрэхтэниитэ буолла.

Сүрэхтэниигэ Земфира Макаровна Кузьмина – СР үтүөлээх бырааһа, Люция Никандровна Васильева – СР культуратын үтүөлээх үлэһитэ, литературнай музей директорын солбуйааччы, Егор Васильевич Дохунаев – музей научнай үлэһитэ, Иван Иванович Слепцов – пенсионер, Муза Ивановна Артамонова – поэт, прозаик Иннокентий Артамонов кэргэнэ, Эльвира Денисовна Нелунова – ХИФУ доцена, педагогическай наука доктара, Анатолий Гаврильевич Нелунов – филологическэй наука кандидата, автор убайа иһирэх тылы эттилэр, өссө да салгыы үлэлэһэригэр алҕаатылар.

Автор кинигэтин туттарарыгар араас киһи өйүгэр хатанан хаалар бэлэхтэри  биэрдэ, холобур З.М. Кузьминаҕа аҕата аатырбыт поэт Макар Кузьмин тапталлаах кэргэнигэр сэрии толоонуттан суруйбут сэдэх суругун куоппуйатын бэлэхтээтэ уо. д. а.

Сүрэхтэнии Иван Гаврильевич бэйэтэ салайан ыытыытынан дэхситик, саас сааһынан барда.

Наҕыл.   Рисунок1 Рисунок2