Аудиовизуальнай нэһилиэстибэ күнүн чэрчитинэн, СӨ норуоттарын аудиовизуальнай нэһилиэстибэлэрин национальнай киинэ уонна П.А. Ойуунускай аатынан судаарыстыбаннай литературнай музей инникитин бииргэ үлэлииллэригэр Сөбүлэҥ түһэристилэр.  Көрсүһүүгэ 80 сс. Таатта улууһун Чөркөөҕөр уһуллубут ыһыаҕы көрүү буолла. Онно кыттыыны ылбыт дьонтон оччотооҕу Таатта улууһун салайааччыта Артемьев Георгий Михайлович, филология билимин кандидата Нелунов Анатолий Гаврильевич, филология билимин дуоктара Оконешников Егор Иннокентьевич, суруйааччы, драматург, киносценарист Айсен Дойду кэлэн ханнык кэмнээҕи киинэ буоларын, кимнээх уһуллубуттарын быһаарыыга кытыннылар. Араас санаалар киирэн, мунаахсыйыы барбытыгар,  педагогика билимин кандидата, өрөспүүбүлүкэтээҕи «Ойуунускай ааҕыыларын” тэрийээччитэ Чехордуна Екатерина Петровна ол кэмнээҕи хаһыакка кэмпириэнсийэ уонна ааҕыылар тустарынан суруллубут ыстатыйаны аҕалан көрдөрбүтэ уонна санаатын эппитэ чопчу быһаарыыга улахан көмөлөөх буолла. Ол түмүгүнэн 1989 с. Ойуунускайга аналлаах ааҕыылар уонна Политссыылканы үөрэтиигэ научнай-практическай кэмпириэнсийэ кэмигэр ыһыллыбыт ыһыах буоларын быһаардылар. Пленкаҕа ол кэмнээҕи интэллигиэнсийэ баар. Бу киинэ пленкатын олох-дьаһах хомунаалынай хаһаайыстыба үлэһитэ, киномеханик үөрэхтээх Дмитрий Прокопьевич Аржаков ыыппыт эбит. Баар дьону чуолкайдыырга Чөркөөхтөн төрүттээх Дьокуускай к. олорор Федосеева К.П., Власова И.Г., Борисова П.П. көмөлөстүлэр. Түмүккэ Музей оҥорбут “П.А. Ойуунускай төрөөбүт алааһын устун” саҥа бырайыагын аан бастаан көрдүлэр.

Ангелина КУЗЬМИНА,

с.н.с., Былатыан Ойуунускай аатынан литературнай музей