Иван Гаврильевич Нелунов 1945 сыллаахха Кэбээйи оройуонугар (төрөппүттэрэ онно үлэлии сылдьыбыттар) күн сирин көрбүтэ. 1962 сыллаахха В.И. Ленин аатынан Уолба сэттэ кылаастаах оскуолатын бүтэрэн, 1962 – 1967 сс. Якутскайдааҕы уонна Ленинградтааҕы художественнай училищеҕа үөрэммитэ. Советскай армияҕа сулууспалаабыта (1968-1970 сс.). Кэргэннээх, икки оҕолоох, үс сиэннээх. Өр кэмҥэ идэтинэн «Сардаана» аатынан сувенирнай фабрикаҕа, якутскайдааҕы ювелирнай заводка, академик В.П. Ларионов аатынан хотугу физтехпроблем институкка, А.С. Пушкин аатынан национальнай библиотекаҕа үлэлээбитэ. Пенсияҕа тахсан баран билигин П.А. Ойуунускай аатынан литературнай музейга үлэлиир.

Кини «В краю родных берез» уонна «Силуэты» (записки по следам старых фотоснимков) диэн кинигэлэрэ утуу-субуу ааспыт сылга (2012 с.) Винокуров И.Д. тылбааһынан нууччалыы тахсыбыттара. Маны таһынан  Иван Нелунов сүрүн үлэтин таһынан өссө сэдэх, сүтэн эрэр былыргы хаартыскалары мунньар, ирдэһэн хомуйсар эмиэ туһугар дьикти дьарыктаах. Онно кимнээх түспүттэрин хасыһан үөрэтэр, кинилэр хас биирдиилэрэ аймалҕаннаах ааспыт кэм дохсун сүүрүгэр туох дьылҕаламмыттарын быһааран бэчээккэ балачча сырдатта, дьон сэҥээриитин, махталын ылыан ылла.