П.А. Ойуунускай аатынан литературнай мусуойга «Новая Звезда» Бүтүн Арассыыйатааҕы ырыа күрэһин финалииһа уонна призёра, «Үрдэл-2019» күрэс кыайыылааҕа Kit Jah ыалдьыттаата. «Kit Jah уонна сахалыы ырыа тыллара» диэн тиэмэҕэ аһаҕас кэпсэтии буолла.
Kit Jah ааттыын ураты саха чаҕылхай ырыаһыта буолар. Кини – Субудай Айыы-Арчылаан Дьулустаан. Аатын хайдах ылыммытын уонна ыллыыр дьоҕурун туһунан маннык кэпсээтэ:
«Субудай диэн Сүбэтэй Айыы-Арчылаан Дьулустаан уолабын. Миигин айыылар арчылааннар итинник ылыммытым. Ырыаларым тылларын бэйэм айабын. Аан маҥнай муусукатын оҥоробун. Сибилигин муусуканы холбоотоххутуна тута айыахпын сөп. Ол миэхэ хантан кэлбитий. Удьуорбар тута хоһуйар уус тыллаах дьонноох эбиппин. «Хотойтон хотой» диэн аҕабар анаммыт ырыалаахпын.  Аҕам Дьулустаан Иванов бэйэтин кэмигэр ыллаан ааспыт киһи буолар. Хомойуох иһин, бу сиртэн эмискэ барбыта. Гоша Васильев-Джиданы кытта бииргэ кэнсиэртиир киэһэбитигэр биир доҕоро кэлбитэ уонна миигин көрөн баран «Хотойтон хотой төрүүр эбит» диэбитэ мин өйбөр хаалан хаалбыт….».
Субудай Айыы-Арчылаан Дьулустаан олоххо ураты киэҥ көрүүлээх, бэрт хорсун ырыһыт буоларын көрдүбүт. Саха быдан мындыр омук буоларын, наар сайда сатыыр дьүккүөрдээҕин, төрөөбүт тылбытын, култуурабытын харыстыахтаахпытын ырыатынан тиэрдэргэ кыһанар ыллыктаах өйдөөх-санаалаах буолан тахсыан тахсыбыт эбит.

Алексей Васильевич Егоров, мелодистар Сойуустарын бэрэссэдээтэлэ, Матрена Петровна Попова, тыл билимин хандьыдаата, «Сэргэлээх» устуудьуйаҕа дьарыктанар устудьуоннар Kit Jah ырыаларын туһунан санааларын эттилэр.

          Субудай Айыы-Арчылаан Дьулустаан ырыа тылын айарга тылы сөпкө туттууга элбэҕи билбитин эттэ. Маннык көрсүһүү ырыаны эдэр айааччыларга барыларыгар инникитин даҕаны олус туһалаах буолуо этэ диэн санаалаах түмүктээтибит. Сахабыт ырыата үйэлээх үгэскэ олоҕуран, сайда туруоҕар эрэнэбит, сардаҥалаах сарсыҥҥыны баҕарабыт!
Ангелина КУЗЬМИНА