Таатта улууһун Баайаҕа нэһилиэгэр элбэх киһи мустуулаах Арассыыйа суруйааччыларын Сойууһун сэкирэтээрэ, Саха сирин суруйааччыларын Сойууһун бэрэссэдээтэлин солбуйааччыта Гаврил Андросов-Хабырыыс Ондороос “Дойдуулаах суор” диэн хоһооннорун саҥа кинигэтин биһирэмэ буолла. Онно олохтоохтор улаханнык бэлэмнэнэн, Хабырыыс Ондороос айымньыларын туһунан ырытыыны, дакылааттары, быыстапканы оҥордулар. Николай Винокуров-Урсун, эдэр бэйиэт, үөлээннээҕэ Рустам Каженкин, оскуолаҕа үөрэппит-такайбыт учуутала Татьяна Игнатьевна Андросова ыалдьыттаатылар, сүбэ-соргу биэрдилэр.

Н.Е. Винокуров-Урсун: «Билигин гражданскай лирика сүтэ быһыытыйбыт кэмигэр ыраас холобур буолар кинигэ таҕыста. Урукку олохпутугар буолан ааспыт түгэннэри, кылааһынан арахсыыны, убай-быраат үрүҥ-кыһыл диэн арахсыытын тэҥҥэ тутан көрдөрөр».

Иккис күнүгэр Татьяна Игнатьевна Андросова «Мөккүөрдээх кэм туоһулара» кыраайы үөрэтэр кинигэтин сүрэхтэниитэ буолла. Олохтоохтор урууку историяҕа кырдьыктаахтык сыһыаннаһыы холобура буолар бу кинигэни биһирээн көрүстүлэр.

Ангелина КУЗЬМИНА