Олоҥхо декадатын чэрчитинэн, “Г.Г.Колесов литература түмэлин балаҕаныгар” тэрээһин буолла. САССР норуодунай артыыһа, Арассыыйа үтүөлээх артыыһа, П.А. Ойуунускай аатынан бириэмийэ лауреата, биллиилээх прозаик Гавриил Гаврильевич Колесов айымньыларын туһунан сэһэргэстибит. «Дьулуруйар Ньургун Боотуру» олоҥхолуу олороро уһуллан хаалбытын көрдүбүт. Кыыһа, опера уонна балет судаарыстыбаннай тыйаатырын концертмейстерын көмөлөһөөччүтэ Оксана Гавриловна Колесова, уола,  Муусука үрдүкү оскуолатын уһуйааччыта Владимир Гаврилович Колесов, 16 №-дээх оскуола 2-с кылааһын үөрэнээччитэ Артем Захаров, РСФСР уонна САССР үтүөлээх артыыската Клавдия Алексеевна Иванова, СӨ култууратын туйгуна, Олоҥхо тыйаатырын  артыыһа Валентин Гаврильевич Исаков, Дьокуускайдааҕы муусука колледжын фольклор отделын сэбиэдиссэйэ Элла Кулагиновна Соколова, РФ үтүөлээх артыыһа, П.А. Ойуунускай аатынан судаарыстыбаннай бириэмийэ лауреата Ефим Николаевич Степанов Г.Г. Колесов туһунан иһирэх ахтыы оҥордулар.

Ефим Степанов: «Тиэннистиирин, хамсанарын сөбүлүүр этэ. Сүбэ-ама биэрэ сылдьарын сөбүлүүр этэ. Биллэн турар, баҕарбыт баҕата саха олоҥхото чабырҕаҕа, дэгэрэҥ ырыата саханы саха гынар көрүҥнэр сайдыахтарын баҕарара. Кини санаата туолан Олоҥхо тыйаатыра баар буолла. Үтүө дьону саныы сылдьыаҕыҥ, санатар буолуоҕуҥ!”.

Үөрэппит оҕото, Эдуард Соколов аймаҕа Элла Кулагиновна Соколова: «Барыбытын кус оҕолорунуу батыһыннаран тыйаатырга илдьэ сылдьара. Ким хайдах оонньообутун ырытыы оҥорорбут. Хаһан да мөхпөт этэ. Биһиэхэ наһаа амарахтык сыһыаннаһара. Мин үөрэтэрбин сурукка-бичиккэ таһаарар дьон буолуоххут диирэ. Кэлин эргиллэн көрдөххө, үөрэппит оҕолоругар олох ураты сыһыаннаах эбит. Суох буолбутугар отделениебыт сабыллар да турукка киирэ сылдьыбыта. Онуоха өйөөбүт дьон баар буоланнар салаабыт күн бүгүҥҥэ диэри үлэлии турар. Улуу киһиэхэ үөрэнэн ааспыппыттан үөрэбин».

 

1968 с. «Дьулуруйар Ньургун Боотур» олоҥхону толорон быластыыҥкаҕа уһуллан үйэтиппит Гавриил Колесов тыйаатыр үлэтин түбүгэр айыан-суруйуон  олус баҕарара. Суруйан хаалларбыт кинигэлэрэ сүдү суолталаахтар. Маннык дьону өрө тутарбыт, аатын үйэтитэрбит наада. Түмүккэ Г.Г. Колесов аата үйэтийэрин туһугар искибиэр тутуллара улахан суолталааҕын туһунан Константин Варламов санаатын эттэ.

Ангелина Кузьмина