«Күлүгүрбэт күлүктэр”, «В краю родных берез», «Силуэты (записки по следам старых фотоснимков)» кинигэлэр ааптардара Иван Гаврильевич Нелунов «Эргэ хаартыскалар тугу кэпсииллэрий?» диэн олус истиҥ сэһэргэһиини ыытта.

Иван Гаврильевич Нелунов – сэдэх, сүтэн эрэр былыргы хаартыскалары мунньар, ирдэһэн хомуйсар эмиэ туһугар дьикти дьарыктаах. Онно кимнээх түспүттэрин хасыһан үөрэтэр, кинилэр хас биирдиилэрэ аймалҕаннаах ааспыт кэм дохсун сүүрүгэр туох дьылҕаламмыттарын быһааран бэчээккэ балачча сырдатта.

Кини 1945 с. Кэбээйи оройуонугар күн сирин көрбүтэ. 1962 с. В.И. Ленин аатынан Уолба сэттэ кылаастаах оскуолатын бүтэрэн, 1962-67 сс. Якутскайдааҕы уонна Ленинградтааҕы художественнай училищеҕа үөрэммитэ. Икки оҕо амарах, үс оҕо тапталлаах эһэтэ. Өр кэмҥэ идэтинэн “Сардаана” сувенирнай фабрикаҕа, Якутскайдааҕы ювелирнай собуокка, академик В.П. Ларионов аатынан Хотугу физтехпроблемалар институттарыгар, А.С. Пушкин аатынан национальнай библиотекаҕа үлэлээбитэ. Билигин П.А. Ойуунускай аатынан литературнай музейга үлэлиир.

Сэһэргэһиигэ дьон-сэргэ эргэ хаартыскаларынан быыстапканы сэргээн көрдүлэр. Хаартыскаҕа түспүт устуоруйаҕа биллэр дьон оҕолорун, чугас дьоннорун кытта көрүстүлэр.