Киэҥ ааҕааччыга биллэр-көстөр суруйааччы, П.А. Ойуунускай аатынан судаарыстыбаннай бириэмийэ лауреата Елена Слепцова-Куорсуннаах айар киэһэтэ бэрт истиҥник буолан ааста. Тымныы күнү аахсыбакка саха литературатын таптааччылар кэлэн суруйааччы үөрүүтүн үллэһиннилэр.
Айар дьоро киэһэни литература музейын научнай үлэҕэ салаа сэбиэдиссэйэ, суруйааччы Николай Винокуров-Урсун салайан ыытта. Кини Куорсуннаах айымньылара билиҥҥи саха литературатыгар дьоһуннаах миэстэни ылалларын, бу сыл киниэхэ ситиһиилээхтик түмүктэнэн эрэрин бэлиэтээтэ уонна «Кыра Тыгын», «На дне пропасти», «Аптаах остуоруйалар» диэн быйыл бэчээттэнэн тахсыбыт саҥа кинигэлэрин билиһиннэрдэ.
Саха сирин Суруйааччыларын сойууһун бэрэссэдээтэлин солбуйааччы Гаврил Андросов ааптар Антуан де Сент-Экзюпери «Маленький принц» остуоруйата «Чолбон» сурунаалга «Кыра Тыгын» диэн тылбаастанан бэчээттэммитин түмүгэр туспа кинигэ буолан тахсыбытын, «Саха сирин суруйааччылара» ассоциация бэрэссэдээтэлэ Олег Сидоров «Аан талҕа» романтан быһа тардан нууччалыы тылбаастанан «На дне пропасти» диэн Москваҕа бэчээттэммитин, ХИНТуоКИ дириэктэрин солбуйааччы, литературовед Матрена Попова «Аптаах остуоруйалары» саха оҕолоро сөбүлээн аахпыттарын уонна баҕа санааларын суруйбуттарын туһунан  кэпсээтилэр. Манна ааҕааччылар эмиэ көхтөөхтүк кытыннылар, Куорсуннаах айар үлэтигэр туһаайан истиҥ-иһирэх санааларын эттилэр.
Иван Осипов https://sakha-pechat.ru/kuorsunnaakh-ayar-kiye%D2%BByetye/