2017 с. алтынньы ый 21 күнэ ойуулуур-дьүһүннүүр искусствоны сэргээччилэргэ үөрүүлээх күн этэ. Икки музейга ити күн Кытай худуоһунньуктарын быыстапкалара аһыллыбыттара. Кулун тутар ый 1 күнүгэр литературнай музейга быыстапка үлэтэ түмүктэннэ. Музей директорын, норуодунай суруйааччы Н.А. Лугинов этиитинэн бу быыстапка умнуллуо суохтаах, эбиитин Кытай уонна Саха сирин худуоһунньуктарын сибээстэрэ өссө бөҕөргүү турарыгар үлэ барыахтаах.

Кини ити доҕордоһууга дьоһун кылаатын 2015 с. киллэрбитэ, хууннар тустарынан кинигэтэ кытай омук тылыгар тылбаастаммыта. Бу кинигэҕэ аны Юй Гуаншень аан дойдуну муударайынан сөхтөрбүт Лао Цзы мэтириэтин оҥорбутун киллэрэригэр бэлэхтээбитэ.

Николай Алексеевич этиитин норуодунай худуоһунньук  Ю.В. Спиридонов үөрүүнэн ылынна. Кини «Китайско-Российская академия изобразительных искусств» диэн саҥа, сонун тэрилтэҕэ дьиҥнээх чилиэнинэн (академигынан) талыллыбыта. Академия «Вместе» диэн ааттаах, кытайдыы, ньууччалыы суруллар сурунааллаах, бииргэ үлэлииргэ анал былааннаах. Быыстапканы түмүктүүр тэрийиигэ Кытайтан кэлэн биһиги университеппытыгар үөрэнэр студеннар, айар эйгэ аанын сэгэтэн эрэр художественнай училище үөрэнээччилэрэ салайааччыларын кытары кыттыыны ыллылар.

Кинилэргэ анаан хаартыскалартан таҥыллыбыт презентация көрдөрүлүннэ. Эбиитин Улуу убайбыт П.А. Ойуунускай туһунан сонун кэпсэтии барда. Кини өссө 1927 сыллаахха Кытай норуотугар анаан хоһоон суруйбута, көҥүлүн туһугар охсуһарга ыҥырбыта. Аан дойду араас норуоттарын инникилэрин ХХ үйэ саҕаланыытыгар өтө көрбүт А.Е. Кулаковскай – Өксөкүлээх Өлөксөй Кытай норуотун олоҕун айымньытыгар ахтан ылбыта эмиэ умнуллубата. Кытай норуота өр сылларга сүгүрүйэр сирдьитин Мао Цзэ Дун хоһооннорун 1959 с. саха поэттара С.Р. Кулачиков – Эллэй уонна Л.А. Попов сахалыы саҥардыбыттара.

Истиҥ кэпсэтии түмүгэр Кытай уонна Саха сирэ түҥ былыргыттан ыкса сибээстээхтэрэ ахтылынна. Ити курдук бииртэн-биири өйдөөн-ахтан, хомуйан, тиһэн истэххэ инникитин бииргэ үлэлииргэ өссө чэпчэки, таһаарыылаах буолуо.