Балаҕан ыйын 10 күнүгэр ини-бии Даниловтар уонна академик Афанасий Осипов үөскээбит, үөрэммит сирдэригэр Мытаах нэһилиэгин Бор диэн алааһыгар Сэмэн Данилов аатынан «Бор көмүс күһүнэ” үрдүк тэрээһиннээхтик ыытылынна. Чахчы от-мас саһаран, көмүһүнэн оонньуу турдаҕына манна Даниловтар уонна Осипов дьиэлэрин таһыгар түһүлгэлээн, суруйааччылар уонна худуоһунньуктар бу тэрээһиҥҥэ барыта 200 киһи, оҕо муһунна. Дьокуускайтан суруйааччылар Сэмэн Тумат, Баһылай Харысхал, Гаврил Андросов уонна Урсун, уруһуйга үөрэтээччилэр, устудьуоннар хоһоон ааҕыытыгар, ырыаҕа, уруһуйга күрэхтэстилэр. Бастыҥнарга лауреат, дипломан ааттара иҥэрилиннэ. Кутаа тула олорон хоһоон ааҕыыта, Сэмэн Даниов ырыалара дуорайдылар. Кэлбит дьон Бор алааска экскурсияҕа сырыттылар. “Анюта (Анна Семеновна – Сэмэн Данилов кэргэнэ) аллеятын», Конфедералистар дьиэлэрин мустубут дьон бэркэ кэрэхсээн көрдүлэр. Күнэ-дьыла да туран биэрдэ. Чахчы Сэмэн Данилов көмүс күһүнэ буолла.

П.А. Ойуунускай аатынан литература судаарыстыбаннай түмэлэ.