Саха сиригэр быйыл III норуоттар икки ардыларынааҕы “Благодать большого снега” поэзия фестивалын арыллыыта  М.К. Аммосов аатынан Хотугулуу Илиҥҥи федеральнай университет “Сэргэлээх уоттара” сынньалаҥ киинигэр олус истиҥник ыытылынна.

Фестивальга кыттыыны ыла Турцияттан наука доктара, поэт Мамед Исмаил, Лондонтан “Silk Road Media” кинигэ кыһатын салайааччыта Марат Ахмеджанов, Болгарияттан поэтесса Надя Попова – Гуновска, Казахстантан поэтесса Куралай Омарова, Казаньтан Татарстан Республикатын тыл, литература уонна искусства наукаларын Академиятын учуонай секретара, прозаик, литературнай критик, филологическай наука кандидата Рустем Галиуллин, Рязань куораттан поэтесса Елена Корнеева, Казаньтан Татарастан кинигэ кыһатын сүрүн редактора, поэт Ленар Шаех, Москваттан поэт Василий Попов, Новосибирискайтан “Сибирские Огни” сурунаал сүрүн редактора, Россия суруйааччыларын союһун правлениятын секретара, поэт Владимир Берязев, Москваттан Россия суруйааччыларын союһун бырабылыанньатын секретара, поэт Александр Ананичев кэллилэр.

Фестиваль арыллыытын Саха сирин народнай поэтессата Наталья Ивановна Харлампьева иилээн-саҕалаан ыытта, кыттыыны ыллылар Саха сирин культураҕа уонна Духуобунаска сайдыытын министрэ В.И. Тихонов, Саха Республикатын суруйааччыларын союһун председателэ И.В. Мигалкин, Саха сирин суруйааччыларын Ассоциациятын председателэ О.Г. Сидоров.

Ыалдьыттарбыт эҕэрдэ тылларын кытары бэйэлэрин хоһооннорун дорҕоонноохтук ааҕан иһитиннэрдилэр. Олохтоох поэттартан Елена Слепцова – Куорсуннаах, Рустам Каженкин – Арчы Уола уонна Зинаида Архипова хоһооннорун аахтылар.

Фестиваль арыллыытын “Виртоузы Якутии” скрипачтар бөлөхтөрүн оонньуулара киэргэттэ. Ону таһынан үҥкүүһүттэр, ырыаһыттар уонна хомусчуттарбыт кытыннылар.

 

Е.В. Дохунаев, Литературнай музей үлэһитэ.