Бүлүүгэ «Мин ыраах, мин чугас Кындылым…” айар күрэх

 

Бүлүүгэ «Мин ыраах, мин чугас Кындылым…” айар күрэх

Саха народнай поэта, прозаик, драматург, Российскай Федерация культуратын үтүөлээх үлэһитэ, Саха АССР искусстволарын үтүөлээх деятелэ, Саха комсомолун бириэмийэтин лауреата, Россия уонна Саха сирин литературнай бириэмийэлэрин лауреата, Бүлүү оройуонун Ытык киһитэ Иван Михайлович Гоголев-Кындыл төрөөбүтэ 90 сылын көрсө «Мин ыраах, мин чугас Кындылым…” диэн анабыл хоһооннору айыыга аһаҕас улуустааҕы күрэххэ 22 киһи кыттыыны ылла, 28 хоһоон суруйулунна. Кинилэр ортолоругар Н.Н. Каратаев аатынан Тааһаҕардааҕы, П.И.Быканов аатынан Халбаакытааҕы орто оскуолалар үөроэнээччилэрэ кытыннылар. Кындылга аналлаах улуус таһымыгар үөрүүлээх тэрээһиҥҥэ “Бүлүү саһарҕалара” суруйааччылар түмсүүлэрин салайааччыта Саха Республикатын суруйааччыларын Союһун чилиэнэ Николай Иванович Иванов Дипломнары уонна поэт кыргыттара Анна Ивановна, Лена Ивановна Гоголевалар автографтаах кинигэлэри туттарда.

«Кындылга үйэлээх махтал» биһирэбилинэн И.П. Ильинов (Бүлүү к.), Е.Д. Протопопова (Бүлүү к.), С.И. Васильев (Тааһаҕар) бэлиэтэннилэр.

Күрэх кыайыылааҕынан Чинэкэттэн Анна Семенова –Арылы Кустук ааттанна. 2 миэстэ Вера Солдатова-Нановаҕа (Дьокуускай к.), 3 миэстэ Галина Алексееваҕа-Сайылык Кыыһыгар ананнылар.

Вера Спиридоновна наҕараадатын улуус баһылыга С.Н. Винокуров Дьокуускайга Д.К. Сивцев-Суорун Омоллоон аатынан государственнай театрыгар Кындылга аналлаах тэрээһиҥҥэ туттарда.

Билсиҥ, күрэх кыайыылаахтарын айымньылара.

1 миэстэ Уйбаан Кындылга

Семенова Анна Дмитриевна -Арылы Кустук , Чинэкэ

Тохсунньу томороон тымныыта,

Тиит тостор кыыдааннаах кыһына,

Будулҕан үүт-тураан тумана

Бүлүүбүн бүрүйэн турбута.

Дьыл кэмин муҥутуур оройо

Дьүкээбил куйаарга ойоро.

Чысхаан тыал хотуттан куһуйар,

Чолбону ол сиргэ угуйар.

Таҥха Хаан түөрэҕин быраҕаат,

Төлкөлөөх дьылҕаны быһаараат.

Баай тыллаах ымыылаах ыччатын

Бу орто дойдуга ыыппыта.

Ийэтин илгэлээх үүтүттэн

Ийэ тыл сүмэтин иҥэрэн,

Тапталлаах түөлбэтин ааттата

Талааннаах биир саарын таҕыста.

Суруйан хаалларда элбэҕи,

Айымньы сөҕүмэр бэлэгин –

Хомоҕой хоһоонун кэрэтин,

Хара тыа алыптаах сэһэнин.

Эһээтин аатын ылынан,

Кындыл Уйбаан диэн ааттанан,

Сахатын удьуорун таһаарда,

Киэҥ сиргэ аар-саарга аатырта!

2 миэстэ. Кындыл

Вера Солдатова-Нанова, Дьокуускай

Кындыл Уйбаан лирата

Кыталыктар үҥкүүлэрэ,

Кылбаарыйар Бүлүү эбэм

Кытылыгар кыыс ырыата.

Кындыл Уйбаан музата

Урсун уйан уйулҕата

Улуутуйар Бүлүү эбэм

Унаарыйар уу нуурала.

Кындыл Уйбаан куба тыла

Куба нуолур хаар намыла,

Бүлүү эбэм нуһараҥа

Тунал маҕан туналҕана.

Кындыл Уйбаан иэйэр тыына-

Иһийэр чуумпу кистэлэҥэ

Сандаарыйар Бүлүү эбэм

Сааскы чаҕыл сарсыардата.

3 миэстэ И М. Гоголевка

Галина Алексеева – Сайылык Кыыһа, Хампа

“Ыйдаах күн анныгар бэрт начаас

Ыалдьыттыы кэлбитиҥ” эн, Уйбаан,

Дьалкыйа таһымныыр талааннаах

Улуу суруйааччы убайбыт!

Өрүкүйэ умайар сүрэххинэн,

Айар илбис күүрээҥҥинэн

Поэзия киэҥ куйаарыгар

Сулус буолан сандаарбытыҥ.

Кыынньар уохтаах иэйиигинэн

Толорбутуҥ олоххун,

Ыраас сырдык суобаскынан

Аакка, чыыҥҥа тардыспакка.

«Сүүс баастаннар да уларыппат

Айар, таптыыр сүрэххинэн»

Сырдык тыыныҥ көтүөр диэри

Умайбытыҥ-ууллубутуҥ…

Күн Айыы киһитэ-Улуу Кындыл!

Үйэлэри уҥуордаан

Өрүү тыыннаах сылдьыаҕыҥ

Таптыыр сахаҥ сүрэҕэр!

Надежда Иванова,

культура уонна норуот айымньытын сайдыытын

оройуоннааҕы Киинин салаатын салайааччыта,

Саха Республикатын культуратын үтүөлээх үлэһитэ