П.А.  Ойуунускай аатынан литературнай мусуойга Сивцев Ефрем Степанович-Таллан Бүрэ төрөөбүтэ 110 сылыгар аналлаах «Үчүгэй Өлүөнэ ырыаһыта — Таллан Бүрэ» быыстапка арыллыыта буолла.

Литература Мусуойун пуондатыгар баар хаартыскалара, Таллан Бүрэ аатынан Бөтүҥ орто оскуолатын Музейын пуондатыгар баар суруйааччы тус бэйэтэ тутта сылдьыбыт маллара көрдөрүүгэ турдулар. Төрөөбүт дойдутун уһулбут виртуальнай бырайыакпытын көрдөрдүбүт.

Суруйааччы Н.Е. Урсун Таллан Бүрэ “Ыыс Булгунньах” диэн алааһыгар квадрокоптерынан устаары тиийбиттэригэр дьикти түбэлтэлэр буолбуттарын туһунан кэпсээнин сэргээн иһиттибит.  Ол курдук хомпоруун хотой уонна Дьөһөгөй оҕолоро сылгылар барахсаттар сэргэ аттыгар тураллара. Алаас иччитэ уруйдуу көрсүбүтүн кэрэһэлииргэ дылылар. Ефрем Степанович хаҥыл хаҥаластартан хааннаах суруйааччы. Онон Хотой көстүбүтэ мээнэҕэ буолбатах. Маҥнайгы псевдонима Дыгыыныскай диэн буола сылдьыбыта да уонна алааһыгар туруорбут сэргэтэ хотой төбөлөөҕө да ону туоһулуур.

Кыыһа, иитээччи идэлээх Софья Ефремовна Баямжина,  Таллан Бүрэ кэргэнэ Марфа Николаевна бииргэ төрөөбүт балыһа Мария Николаевна Харитонова:

— Олус үчүгэй тэрээһин буолла. Ефрем Степанович олус аҕыйах саҥалаах, чуумпу, сэттэ оҕолоох ыал аҕата мөҕө-этэ сылдьыбакка барытын бэйэтин холобурунан көрдөрөрө. Аата үйэтитиллэригэр, ыччат айымньыларын элбэхтик ааҕарыгар баҕарабыт!

Ангелина КУЗЬМИНА