Саха Өрөспүүбүлүкэтин Судаарыстыбаннаһын күнүн бэлиэтээһин чэрчитинэн, П.А. Ойуунускай аатынан литература судаарыстыбаннай түмэлигэр норуодунай суруйааччы Андрей Васильевич Кривошапкины кытта көрсүһүү буолла. Көрсүһүүгэ Аартыканы сайыннарыыга уонна Төрүт олохтоох аҕыйах ахсааннаах хотугу норуоттар дьыалаларыгар миниистири солбуйааччы Михаил Александрович Погодаев, Саха сирин хотугу аҕыйах ахсааннаах төрүт олохтоох норуоттарын бырааптарын боломуочунайа Иванова Лена Степановна, хотугу аҕыйах ахсааннаах төрүт олохтоох норуоттар Ассоциацияларын бастакы вице-бэрэсидьиэнэ Христофорова Любовь Викторовна кытыннылар.
Андрей Васильевич эбээн литературатын хайысхатын туһунан кэпсээтэ. «Дьылҕам кытыла» арамаана суруллан бүппүтүгэр бэчээккэ тахсыахтаах бэйэтин уочаратын оччотооҕуга балачча сааһырбыт П.А. Ламутскайга туран биэрбитэ. Платон Афанасьевич «Сир иччитэ» арамаана бэчээттэнэн тахсыбытын кэннэ «эбээн арамаана буолбатах» диэн кэпсэтии баар буола сылдьыбыта. Онуоха А.В. Кривошапкин «сахалыы да, нууччалыы да буолбутун иһин, эбээн арамаана буолар» диэн быһааччы этэн Учууталын көмүскээн турар.
Ол курдук Андрей Васильевич дьонун-сэргэтин күн бүгүнүгэр диэри өйүү, көмөлөһө сылдьар норуот киһитэ. Суруйааччы олоҕун-дьаһаҕын, норуотун туһунан истиҥник кэпсээтэ. Биирдэ эдэр сылдьан Аллайыахаҕа табаһыттары көрсөн кэлбитин кэннэ “дьоруой буолбуккун” диэбиттэр. Баартыйаҕа бэйэбит киһибит, эбээн киһитэ, киирбит диэн үөрэн-көтөн, долгуйан туран кинини итинник ааттаабыттар эбит. Онон суруйааччы норуотугар туһаайар аналын, бэлиитик быһыытынан дьылҕатын, айар ньыматын үөрэтэргэ элбэҕи биэрэр кэпсэтии буолла.
Бэлэмнээтэ с.н.с. Ангелина Кузьмина