Маҥнай Н.Д.Неустроев памятнигар Ньукуола таҥаратын дьиэтин таһыгар тыыннаах сибэкки ууран, суруйааччы сырдык аатыгар сүгүрүйэн кэллибит. Бу памятнигы Саха сирин Суруйааччыларын союһун көрдөһүүтүнэн саха норуодунай худуоһунньуга, биир дойдулаахпыт Максим Максимович Павлов 2011с. оҥорбутун, үбүлээһинин аймахтара Абрамов, Гоголевтар оҥорбуттарын   туһунан суруйааччы Н.Е.Винокуров-Урсун тыл этэригэр кылгастык кэпсээн аһарда.

Памятникка Николай Денисович аатын кытта ийэлэрин Ксения Петровна, аҕаларын Денис Петрович, балтын Анна Денисовна ааттара суруллубут. Ол иһин манна Анна Денисовна аатыгар сибэкки ууруута тэрилиннэ.

Саха дьахталларыттан бастакы ССРС Суруйааччыларын союһун чилиэнэ, биллиилээх оҕо суруйааччыта, тылбаасчыта, фольклориһа, общественнай деятелэ  Анна Денисовна Неустроева төрөөбүтэ 115 сылын бэлиэтээн, ирэ-хоро кэпсэтэн, сэһэргэһэн кулун тутар 6 күнүгэр П.А.Ойуунускай аатынан литературнай музейга үтүө-мааны дьоро киэһэ буолан ааста. Бу тэрээһин Ойуунускай аатынан литературнай музейын коллектива суруйааччылар Николай Денисович уонна Анна Денисовна Неустроевтар  дойдуларын аймах-билэ дьонунуун – Уус-Таатта нэһилиэгин уонна оскуолатын кытта холбоһуктаах ыытыллынна. Бу дьоро киэһэҕэ суруйааччылар, кыраайы үөрэтээччилэр,  суруналыыстар, суруйааччы айар талааныгар сүгүрүйээччилэр, биир дойдулаахтара, аймахтара кэлэн кыттан тыл эттилэр.

Национальнай библиотека кыраайы үөрэтэр салаатын үлэһиттэрэ А.Д.Неустроева сэдэх кинигэлэрин, тылбаастарын, ыстатыйаларын наардаан интэриэһинэй быыстапка оҥордулар. Суруйааччы  олоҕун, айар үлэтин көрдөрөр хаартысканан быыстапканы, ону таһынан литературнай музей фондатыттан А.Д.Неустроева кэтэ сылдьыбыт  маҥан өҥнөөх сиитэс матырыйаалтан тигиллибит уһун сиэхтээх былааччыйаны кытта кугас баархат хаһыаччыга көрдөрүүгэ туруорулунна.

Анна Денисовна ииппит кыыһа Акулина Михайловна тутта сылдьыбыт малын-салын, мэтээллэрин, сэдэх хаартыскаларын аймахтара аҕалан көрдөрдүлэр.

Бу тэрээһиҥҥэ норуодунай суруйааччылар  Н.А.Лугинов, Н.И.Харлампьева, Таатта улууһун дьаһалтатын баһылыгын солбуйааччы И.А.Сивцева, төрөөбүт нэһилиэгиттэн Н.Д.Неустроев аатынан оскуола директора Г.Г.Винокуров, Николай уонна Анна Неустроевтар үбүлүөйдэрин элбэхтик тэрийбит, оскуолаҕа Николай Денисович аатын бэрдэрбит П.Г.Дягилев, поэт, прозаик Е.В.Слепцова-Куорсуннаах, музей үлэһитэ И.Г.Нелунов уонна үс Ааналартан биирдэстэрэ, Анна Егоровна уонна буойун-суруйааччы Макар Хара маанылаах кыыстара,   суруйааччы аймаҕа, Земфира Макаровна тыл эттилэр.

Уус-Таатта орто оскуолатын баай матырыйааллаах музейыттан Неустроевтар тустарынан медиапрезентация, суруйааччы олоҕун төһө билэҕин ыйытыктардаах викторина, ону таһынан Уус-Таатта 7 кылааһын үөрэнээччилэрэ А.Д.Неустроева “Тиргэһиттэр” кэпсээнинэн сыаҥка оонньоон көрдөрбүттэрин олус астына көрдүбүт.

Бу курдук урукку сылларга филологическай наука кандидата, тюрколог Юрий Иванович Васильев уонна литературнай музей научнай үлэһитэ Р.Т.Аммосова  Николай уонна Анна Неустроевтар үбүлүөйдээх сылларыгар  литературнай музейга дьонун-сэргэтин мунньан өйдөөн-санаан ахтан ааһар биэчэрдэри куруук тэрийэллэрин туһунан Николай Егорович ахтан туран кэпсээтэ. Кинилэр 2000 с-хха үйэтитэн хаалларбыт кэпсэтиилэрин музей фондатыттан быһа тардан көрдөрдүбүт. Манна итии үүттээх чэйдээх остуол тула олорон сэһэргэһиилэрин устан хаалларбыттарыттан быһа тардан Акулина Михайловна оҕо сылдьан ийэтин Анна Денисовналыын куруук сылдьарын, Платон Ойуунускайы көрбүтүн, кыра Мусялыын, Ланалыын   оонньуурун, о.д.а. түгэннэри кэпсээбитин долгуйа, эмиэ да астына көрдүбүт, иһиттибит.

Ити курдук А.Д.Неустроева сырдык өйө-санаата, аһыныгас дууһата, булчут(кусчут) бэрдэ, талааннаах суруйааччы, тылбаасчыт, дьахтар хамсааһынын Саха сиригэр бастакынан салайсыбыт биир үтүө киһибит туһунан өйдөбүнньүк үйэлээх  ахтыы киэһэтэ барыбытын  бииргэ түмтэ.