Литературнай музейга сэтинньи 23 күнүгэр бөдөҥ государственнай, общественнай-политическай  деятель, кэпсээнньит, публицист, драматург, Ойуунускай аатынан литературнай музей бастакы дириэктэрэ, П.А.Ойуунускай аатынан судаарыстыбаннай бириэмийэ лауреата  В.А.Протодьяконов-Кулантай төрөөбүтэ 105 сылын бэлиэтиир “Аҕа көлүөнэ эркээйилээх суолунан” ахтыы киэһэтэ буолан ааста. Кулантай сиэннэрэ, чугас аймахтара, бииргэ үлэлээн алтыһан ааспыт дьонноро мустан Василий Андреевич  республика туһугар оҥорбут үтүөлэрин, киһи, суруйааччы, музей дириэктэрин быһыытынан үлэтин ахтан-санаан аастылар.

Ону таһынан I Хоро нэһилиэгин дьоно-сэргэтэ суруйааччы Кулантай “Күүт миигин” диэн Аҕа дойду сэриитин кэминээҕи тыа ыалын олоҕуттан киһи хараастар түгэнин, ону таһынан  “Муот киһи” диэн Василий Андреевич бэчээттэммэтэх айымньытыттан 30-с сыллардааҕы хаалынньаҥ өйү-санааны көрдөрөр, саралыыр  комедияны Тумул норуодунай театрын артыыстарын толоруутугар астына-дуоһуйа көрдүбүт.

Василий Андреевичтыын бииргэ үлэлээбит В.Д.Михайлов  В.А. Протодьяконов-Кулантай туһунан кини дьиҥнээх  коммунист буолан саамай улахан ситиспит ситиһиитинэн бу музей дьиэтин туттарбытын уонна үп-харчы

тыырыллыытын бэккэ билэр буолан туох да мэһэйэ суох барыта үлэҕэ киирбитин кэпсээтэ. Поэт А.Г.Старостин-Сиэн Кынат В.А.Протодьяконов-Кулантайы  бастакыта саамай кытаанан кэмнэргэ 40-50 сс. Үп министринэн, иккиһэ Ойуунускай музейын туттаран, икки сүдү олоҕу олорбута, сахаҕа маннык киһи суоҕа буолуо диэн ыйда. Бу ахтыы киэһэтин Кулантай аатынан Чараҥнааҕы литературнай музей салайааччыта З.В.Мигалкина  ыытта.

Икки  музей фондатыттан кыттыгас“Аҕа көлүөнэ эркээйилээх суолунан”  быыстапка нэдиэлэ устата сэтинньи 30 күнүгэр диэри туруоҕа. Манна Кулантай толору наҕараадалара, рукописьтара, айымньылара, туттубут мала-сала

турдулар. Сэрии кытаанах  кэмигэр үп бастакы наркомунан үлэлээбит, онтон Саха АССР салайыыга эппиэттээх үлэлэргэ сылдьыбыт,  суруйааччы, Ойуунускай музейын бастакы дириэктэрэ  В.А.Протодьяконов-Кулантайга анааллаах быыстапканы кэлэн көрүҥ, үтүө киһи хорсун, хоодуот олоҕо билиҥҥи ыччакка, билиҥҥи сахаҕа үтүө холобуру, эркээйилээх суолу ыйдын.