И.В. Пухов – саха олоҥхотун, фольклорун, түүр-монгуол эпостарын уопсай өрүттэрин, уратыларын, киэҥник – култуураларыгар биир сүрүннэрин үөрэппитэ билимҥэ дьоһун миэстэни ылар.
П.А. Ойуунускай аатынан литература түмэлин пуондатыгар И.В. Пухов суруктара, µлэлэрин рукопистара уонна тус бибилэтиэкэтиттэн барыта 2552 кинигэ баар. Онно тува, эрмээн, нуучча, халха-монгуол, осетиннар, былыргы индия, казах, Кавказ норуоттарын о.д.а. эпостара, фольклорга уонна этнографияҕа үлэлэр хараллан сыталлар. 2015 с. түмэл отделын сэбиэдиссэйэ, тыл билимин кандидата Раиса Терентьевна Аммосова Р.П.Алексеев “Алаатыыр Ала Туйгун” диэн олоҥхотун уонна И.В.Пухов туһунан кинигэ таһаарбыта. Бу кинигэтигэр кини «учуонай биир сөхпүтэ уонна ыарырҕатара баар эбит: бу сүдү олоҥхо үгэс буолбут каноннартан, формалартан уларыйыылардааҕа… Онон, «Алаатыыр Ала Туйгун» биһиги кэммитигэр тиийэ кэлбит олоҥхо сэбиэскэй киһи бэйэтэ өйдүүрүнэн, ылынарынан сөптөөх уларытыылары киллэрбит олоҥхото буолар. Маныаха учуонай «бу былыргы олоҥхо онтон эмсэҕэлээбит дуо?» диэн ыйытыы туруорар. Биир өттүнэн ол – хомолтолоох диир, биир өттүнэн бу «көннөрүү» урукку олоҥхоһуттар хайдахтаах сүдүлэрин, кыахтаахтарын туоһулуур”, – диэн бэлиэтээбитэ [2015 с.].
И. В. Пухов олоҥхо саха устуоруйатын кытта ыкса сибээстээх диэн бэлиэтээбитэ: «…восходят еще к тем временам, когда предки якутов жили на своей прежней родине и тесно общались с древними предками тюрко-монгольских народов Алтая и Саян» (Пухов И.В. Героический эпос алтае-саянских народов и якутское олонхо, 2004). Хаартыскаҕа: И.В.Пухов фольклорист Г.М.Васильевтыын, 1952 с., Литература түмэлин пуондатыттан