П.А.Ойуунускай аатынан литература музейыгар СӨ култууратын туйгуна, кыраайы үөрэтээччи, худуоһунньук, Иван Гаврильевич Нелунов 75 сааһын томточчу туолбут үөрүүлээх сылын бэлиэтиир уонна сахалартан бастакы скульптор үөрэхтээх Семен Андросов туһунан «Түстэммэтэх төлкө» уус-уран кинигэтин сүрэхтиир тэрээһин буолла. Иван Гаврильевич үгүстүк өрөспүүбүлүкэ хаһыаттарыгар суруйар, саһарбыт хаартыскалар кэрэхсэбиллээх кэпсээннэрин, сэһэннэрин ирдэһэр идэлээх. Хас да кинигэ ааптара. Кини, бэйэтин гражданскай ытык иэһин быһыытынан, Кузьмин М.И.-Макар Хара аатын умнуллубат истиэндэҕэ (Бэчээт дьиэтин таһыгар) суруттарары ситиспитэ. Ярославль куоракка олохсуйбут биир дойдулааҕын Винокуров И.Д. кинигэлэрин хомуйан сахалыы бэчээттэппитэ. Уолба оскуолатын олбуоругар ийэтэ Хоноехова А.В. 100 сааһынан Анна Неустроева “Тиргэһиттэр” диэн кэпсээнин сюжетынан литературнай өйдөбүнньүк туруорбута, Винокуров А.-Олбинскай сүппүт үлэтин булан, Уолба музейыгар биэрбитэ. Кини маҥнайгы кинигэтэ “Күлүгүрбэт күлүктэр” 2015 с. тахсыбыта. «Түстэммэтэх төлкө» кинигэтэ сахаттан бастакы скульптор идэтигэр уһуллубут Андросов Семен Андреевич туһунан буолар. Бу кинигэҕэ КГБ архыыбыттан ханна да тахса илик сэдэх докумуоннар киирбиттэр. Тэрээһиҥҥэ литература түмэлин дириэктэрэ Н.А.Лугинов, үлэһиттэрэ Н.Е.Винокуров-Урсун, Д.П. Иванова, Е.С. Ноговицына, Е.В. Доухнаев, В.И.Бочонина, А.Н. Павлов-Дабыл, убайа тыл билимин хандьыдаата А.Г. Нелунов, кэргэнэ Елена Денисовна о.д.а. кытыннылар. Таатта улууһун баһылыгын Михаил Соров аатыттан “За многолетний труд и вклад в увековечивание культурно-исторического наследия Таттинского улуса” диэн муниципальнай бэлиэни, Уолба нэһилиэгиттэн дьокутаат В.П. Рахлеев уонна баһылык А.Винокуров Уолба нэһилиэгин Бочуоттаах олохтооҕо оҥорбуттарын туһунан эттилэр.
Көрөөччүлэртэн Альбина Громова санаатын үллэстибитин таһаарабыт: «Барыгытыгар улахан махтал! Наһаа интэриэһинэй көрсүһүү буолла. Бэйэбэр бэрт элбэҕи эбинним. Дьикти дьылҕалаах, саха норуота киэн туттар дьоно ааттара ааттана турдун! Уус Алданнарга сыһыаннааҕы сэргээтим. Саҥа дьылынан дьолу-соргуну баҕарабын!”. Тэрээһини дириэктэри солбуйааччы Л.Н.Иванова ыытта.

 63 total views,  1 views today

от admin

52 года, образование высшее.