Былатыан Ойуунускай аатынан литература түмэлэ саха литературатын классик суруйааччыларыттан биирдэстэрэ, кэпсээнньит, хоһоонньут, драматург, комедияны суруйааччы, очеркист, тылбаасчыт, фольклору чинчийээччи, этнограф Николай Денисович Неустроев төрөөбүтэ 125 сылыгар аналлаах “Күлүү кыымын саҕан” онлайн тэрээһини ыытта.
Бу күн суруйааччы Н.Д. Неустроев күлүм гынан ааспыт кэрэхсэбиллээх олоҕун, айар үлэтин кэрэһилиир экспонаттар тустарынан көрөөччүлэр элбэҕи биллилэр. Суруйааччылар, литературоведтар, Саха театрын артыыстара, төрөөбүт Уус Тааттатын дьоно, Ойуунускай аатынан литература музейын үлэһиттэрэ, суруйааччы Н.Д. Неустроев аймахтара, үлэлээбит сириттэн Уолбаттан кытыннылар. Тэрээһини түмэл научнай-сырдатар салаатын салайааччыта Н.Е. Винокуров-Урсун ыытта.
Дириэктэр, Саха сирин норуотун суруйааччыта Н.А.Лугинов, суруйааччылар Ассоциацияларын председателэ О.Г. Сидоров Н.Д. Неустроев төрөөбүтэ 125 сылынан суруйааччылары, ааҕааччылары эҕэрдэлээтилэр. Улуу суруйааччы сыдьаана Георгий Семенович Протопопов итии-истиҥ эҕэрдэтин эттэ. Кини хос эбээтэ Мавра Петровна Неустроева – суруйааччы аҕатын бииргэ төрөөбүт балта. Чугас аймаҕа Акулина Михайловна Неустроева видеоҕа уһуллубутун көрдүбүт. Н.Д. Неустроев биир дойдулааҕа, Уус Тааттаттан төрүттээх литература билимин хандьыдаата, Хотугулуу-Илиҥҥи норуоттар тылларын уонна култуураларын институутун дириэктэрин билимҥэ солбуйааччыта М.П. Попова быйылгы үбүлүөйдээх сылга институт туох үлэни ыыппытын, инники былааннарын кэпсээтэ. Эдэр литературоведтартан тахсыылаахтык үлэлиир, Гуманитарнай чинчийии уонна хотугу аҕыйах ахсааннах омуктар кыһалҕаларын үөрэтэр институт фольклор уонна литература отделын научнай үлэһиттэрэ, филология билимин кандидааттара С.Е. Ноева “Н.Д.Неустроев кэпсээннэригэр уус-уран эйгэ уратыта”, М.А.Кириллина “Н.Д.Неустроев – саха литературатыгар күлүү жанрын төрүттээччи” диэн тиэмэлэргэ дакылаат аахтылар.
Быйыл киинэ экрааннарыгар «Тиэтэйбит» киинэ тахсыбыта. Бары да олус сэргээн көрдүбүт. Киинэ режиссера Роман Дорофеев. Омуннаах Уйбаан оруолун олус итэҕэтиилээхтик Иннокентий Луковцев оонньообута. Кини бу тэрээһиҥҥэ кыттан киинэҕэ хайдах уһуллубутун, оонньообутун кэпсээтэ.
Суруйааччы туһунан олус үчүгэй документальнай киинэ оҥоһуллубут. Киинэҕэ матырыйаалы Н.Д.Неустроев аатынан Уус Таатта орто оскуолатын саха тылын, литературатын, төрүт культура учууталлара Неустроева Евдокия Гаврильевна, Николаева Алевтина Пятионовна, Кочнева Анна Софроновна, Николаева Дарина Васильевна уонна оскуола педагог-библиотекара Готовцева Розабелла Ананьевна түмпүттэр, алын кылаас учуутала Постникова Ульяна Николаевна видеомонтаһы таҥан оҥорбут. Тиэкиһин алын кылаас учуутала Никулина Софья Павловна аахпыт.
Уус-Таатта орто оскуолатын төрүт култуураҕа учуутала, 10 кылаас салайааччыта Кочнева Анна Софроновна уонна үөрэнээччилэрэ “Ытык маллар» диэн улуус музейдарыгар харалла сытар Николай Неустроевка сыһыаннаах экспонаттар уонна саҥа сквер, скульптор Постников Дмитрий Гаврильевич тустарынан видео устубуттарын көрдүбүт. Оруолга уһулуннулар: сырдатааччы оҕо – Айта Никулина. Кэпсиир оҕолор – Дима Гоголев, Ариан Винокуров, Маша Баишева. Видеону уһулла, монтажтаата –Аделина Осипова.
“Үс Ааналар” диэн хаартысканан суруйааччы бииргэ төрөөбүттэрин туһунан сэһэни (Хоноехова Анна Васильевна, Неустроева Анна Денисовна, Кузьмина Анна Ивановна) СР культуратын туйгуна, музейбыт бэтэрээнэ, худуоһунньук, уус, краевед Иван Гаврильевич Нелунов кэпсээтэ.
Лингвист-учуонай, түмэт диэйэтэл, тыл үөрэҕин билимнэрин ханьыдаата, СӨ Суруйааччыларын сойууһун чилиэнэ, РФ Суруналыыстарын Сойууһун чилиэнэ, Турция Суруйааччыларын сойууһун чилиэнэ Юрий Иванович Васильев-Дьаргыстайы Николай Неустроев айымньылара саха норуотугар кинигэ буолан тахсалларыгар үлэлээбит, сүүрбүт-көппүт киһинэн билинэбит. Неустроевтар Анна уонна Николай саха литературатыргар сөптөөх сыанабылы ылалларыгар улахан үтүөлээх киһи этэ. Хомойуох иһин, кини олус эрдэ соһуччу бу олохтон барбыта. Кэргэнэ фтизиатр быраас, медицинскэй наука кандидаата, РФ, СӨ Доруобуйаҕа харыстабылын туйгуна Н.А. Золотарева оччотооҕу кэми сэгэтэн кэпсээтэ.
«”Ваятель” о скульпторе Отур Силис» диэн тиэмэҕэ түмэл научнай сотруднига Е.С.Ноговицына, оттон суруйааччы кэриэс малларын туһунан научнай-экспозиционнай салаа сэбиэдиэссэйэ Нь.В.Халгаева кэпсээтилэр.
П.А. Ойуунускай аатынан Саха академическай драматическай театрын артыыһа Татьяна Легантьева Литература музейын көҕүлээһининэн ыытыллыбыт өрөспүүбүлүкэтээҕи Н.Д. Неустроев айымньыларынан ааҕыы күрэҕин түмүгүн билиһиннэрдэ. Ааҕыы күрэҕин кыайыылаахтара суруйааччы айымньыларын уус-ураннык ааҕан иһитиннэрдилэр.
П.А.Ойуунускай аатынан литература түмэлэ.
