…аатынан түмэл коллективын үйэ аҥаардаах үбүлүөйгүтүнэн итиитик- истиҥник эҕэрдэлиибин!
Өрүү аһаҕас ааннаах, үлэһит, уостубат айар куттаах, ытык ыал курдук хас биирдии кэлбит киһини элэккэйдик көрсөр, уонунан сыллар усталарыгар мунньубут үйэлээх матырыйаалгыт ис хоһоонун тэҥҥэ үллэстэр, өрүү сылаастык саныыр түмэл бары үлэһиттэригэр дириҥник сүгүрүйэбин, бу өрөгөйдөөх үөрүүгүтүн тэҥҥэ үллэстэбин!
Саха киһитин ириэнэх кута эһиэхэ баар, ол иһин чугас аймах курдук сыһыаҥҥытын суохтаан, хас тиийдэҕим аайы эһиги ыалдьытымсах дьиэҕитин тумна хаампаппыттан, хас биирдиигитин кытта ирэ-хоро кэпсэтэн, саҥаны- сонуну билэн, сүрэхтиин сылаанньыйан, дойдубар, Өймөкөөн сиригэр, эһиги түмэлгит сонунун, үлэтин туһунан кэпсээн кэһиилээх кэлэрбиттэн астынабын!
Махтанабын миигин ыҥыран көрсүһүү оҥорбут тэрээһиннэргитигэр, оҕом уонна биһиги кинигэлэрбитин сүрэхтээбит долгутуулаах киэһэлэри тэрийбиккитигэр, атын кэрэхсэбиллээх тэрээһиннэргэ баар буоллахпына өрүү ыҥыраргытыгар. Народнай суруйааччылар Н.А. Лугинов, Н.Е. Винокуров-Урсун курдук бас-көс дьонноох коллектив күн аайы төһөлөөҕү билэ-иҥэринэ олороргутугар ымсыырыах эрэ санаа кэлэр. Киэҥ далааһыннаах, өрө күүрүүлээх үлэҕит кэлин сылларга Линда Николаевна көҕүлээһининэн ордук күүһүрдэ. Ньургуйаана Викторовна биир көрдөһүүнү быһа көтүппэккэ көмөлөһөрүгэр, бириэмэттэн бириэмэтигэр билсэ олорор Яна Поскачинаҕа түгэнинэн туһанан дириҥ махталбын ыыталыыбын. Уонна оттон киирбит киһи хараҕар көстүбэккэ, ханна эрэ кыра хосторго түмэл үлэтин чинчийэ-сааһылыы олорор дьоннор төһөлөөҕү оҥороргутун сэрэйиэххэ эрэ сөп.
Саха норуотун өйүн-санаатын уһугуннарбыт, көҥүл олох туһугар сомоҕолообут, «үс саха үөскүүрүн түстээбит, түөрт саха үөрүөҕүн эппит», улуу киһибит П.А. Ойуунускай аатын сүгэр түмэл үлэһиттэрэ үйэлээх үлэҕит туругура турдун, оҥорор ытык дьыалаҕытыгар сүгүрүйээччи, тэрээһиннэргитигэр сылдьааччы, махтал бастыҥын этээччи элбии, түмэлгэ киирэр суолгут чиҥии-кэтирии турдун!!!
Мария Поликарповна Боярова,
РФ үтүөлээх учуутала,
РФ үөрэҕириитин бочуоттаах үлэһитэ,
СР Учууталларын учуутала,
Өймөкөөн улууһун бочуоттаах олохтооҕо,
Томтор орто оскуолатын Литературнай музейын салайааччыта#литмузейэҕэрдэр11 ч.
